തിരുവനന്തപുരം: വിഎസ്എസ്സിയില് രജിസ്ട്രേഷന് റദ്ദാക്കിയ തൊഴിലാളി സംഘടനയുടെ പേരില് അനധികൃത പണപ്പിരിവ്. ഡിപ്പാര്ട്ട്മെന്റിനെ തെറ്റിദ്ധരിപ്പിച്ചാണ് വിഎസ്എസ്സി എംപ്ലോയിസ് യൂണിയന് എന്ന സംഘടന അനധികൃത പണപ്പിരിവ് നടത്തുന്നത്.ട്രേഡ് യൂണിയന് നിയമ പ്രകാരം 1972ല് രൂപീകരിച്ചതാണ് വിഎസ്എസ്സി എംപ്ലോയിസ് യൂണിയന്. എന്നാല് സംഘടനയുടെ വാര്ഷിക കണക്കും പ്രവര്ത്തന റിപ്പോര്ട്ടും ലേബര് ഓഫീസില് സമര്പ്പിക്കാത്തതിനെ തുടര്ന്ന് 1979 ല് സംഘടനയുടെ അംഗീകാരം റദ്ദായി. എന്നാല് ജീവനക്കാരുടെ അംഗീകൃത സംഘടനയെന്ന നിലയില് ഇന്നും വിഎസ്എസ്സിയില് സംഘടന പ്രവര്ത്തിക്കുന്നു. അംഗീകൃത സംഘടന എന്ന് വിഎസ്എസ്സിയെ തെറ്റിദ്ധരിപ്പിച്ച് ജീവനക്കാരുടെ ശമ്പളത്തില് നിന്ന് മാസവരിയും ഈടാക്കുന്നു. ഇത്തരത്തില് ലക്ഷക്കണക്കിന് രൂപയാണ് നിയമവിരുദ്ധമായി സംഘടന പിരിച്ചെടുത്തത്. മാസവരി കൂടാതെ വാര്ഷിക തുക ഇനത്തിലും ഇതിനു പുറമെ ധന സമാഹരണം സംഘടന നടത്തുന്നുണ്ട്.
വിഎസ്എസ്സിയില് രാഷ്ട്രീയ പ്രവര്ത്തനം അനുവദിക്കാന് പാടില്ലാത്തതിനാല് ജീവനക്കാരുടെ ആവശ്യങ്ങള് ചര്ച്ച ചെയ്യാന് ജെസിഎം സമിതി രൂപീകരിച്ചിരുന്നു. രാഷ്ട്രീയത്തിനതീതമായി വിഎസ്എസ്സിയിലെ എല്ലാ സ്ഥാനപങ്ങളിലെയും ജീവനക്കാരുടെ പ്രതിനിധികള് ജെസിഎം സമിതിയില് എത്താറുണ്ട്. എന്നാല് ജെസിഎമ്മിലും രാഷ്ട്രീയ അതിപ്രസരം വന്നതോടെ കഴിഞ്ഞ രണ്ട് വര്ഷമായി പുതിയ സമിതിക്ക് അനുമതി നല്കിയിട്ടില്ല. സമിതിക്ക് അംഗീകാരം നല്കിയില്ലെങ്കിലും എംപ്ലോയിസ് യൂണിയന്റെ ധനശേഖരണത്തിന് യാതൊരു കുറവും വരുത്തിയിട്ടില്ല.
