വയലാ ശ്രീ ബാലസുബ്രഹ്മണ്യ ക്ഷേത്രത്തില്‍ ധ്വജപ്രതിഷ്ഠ-ഉത്സവ കൊടിയേറ്റ് ഇന്ന്

കുറവിലങ്ങാട്: വയലാ ശ്രീബാലസുബ്രഹ്മണ്യ സ്വാമിക്ഷേത്രത്തിലെ ധ്വജപ്രതിഷ്ഠ-ഉത്സവ കൊടിയേറ്റ് ഇന്ന് നടക്കും. രാവിലെ 5.45 നും 7.25 നും മദ്ധ്യേയുളള മുഹൂര്‍ത്തത്തില്‍ ധ്വജപ്രതിഷ്ഠ നടക്കും. വൈകിട്ട് ദീപാരാധനയ്‌ക്ക് ശേഷം പറവൂര്‍ രാകേഷ് തന്ത്രികളുടെയും കളത്തൂര്‍ ബാബു ശാന്തിയുടെയും മുഖ്യകാര്‍മ്മികത്വത്തില്‍ കൊടിയേറ്റ് നടക്കും. രണ്ടിന് രാവിലെ 10.30ന് നടക്കുന്ന സമ്മേളനത്തില്‍ എസ്എന്‍ഡിപി യോഗം ജനറല്‍ സെക്രട്ടറി വെളളാപ്പളളി നടേശന്‍ ചുറ്റമ്പല സമര്‍പ്പണവും നടപ്പന്തല്‍ സമര്‍പ്പണവും നിര്‍വ്വഹിക്കും. യോഗം പ്രസിഡന്റ് എം.എന്‍ സോമന്‍ സമ്മേളനം ഉദ്ഘാടനം ചെയ്യും. മീനച്ചില്‍ യൂണിയന്‍ കണ്‍വീനര്‍ അഡ്വ കെ.എം. സന്തോഷ്‌കുമാര്‍ അദ്ധ്യക്ഷത വഹിക്കും. ധര്‍മ്മ ചൈതന്യസ്വാമി അനുഗ്രഹ പ്രഭാഷണം നടത്തും. യൂണിയന്‍ ചെയര്‍മാന്‍ അഡ്വ എസ്. പ്രവീണ്‍ മുഖ്യപ്രഭാഷണം നടത്തും. മാര്‍ച്ച് മൂന്ന്, നാല്, അഞ്ച്, ആറ് ദിവസങ്ങളില്‍ രാവിലെ 10.30ന് പ്രഭാഷണം നടക്കും. ആറിന് ഉച്ചകഴിഞ്ഞ് 3.30ന് ആറാട്ടുബലി, ആറാട്ടുപുറപ്പാട്, വൈകിട്ട് 6.30ന് ആറാട്ട് കാവടിഘോഷയാത്ര ഞരളപ്പുഴ ശ്രീധര്‍മ്മശാസ്താ ക്ഷേത്രത്തില്‍ നിന്നും പുറപ്പെടുന്നു. മയില്‍പ്പീലിന്യത്തം, പൂക്കാവടി, കൊട്ടക്കാവടി, പമ്പമേളം, പഞ്ചവാദ്യം, താലപ്പൊലി, കാവടി എന്നിവയുടെ അകമ്പടിയോടെ പുറപ്പെടുന്ന കാവടിഘോഷയാത്രയ്‌ക്ക് 7.30ന് പാറത്തുരുത്തിക്കാവില്‍ സ്വീകരണം നല്‍കും. 8ന് സ്‌കൂള്‍ ജംഗ്ഷനില്‍ എതിരേല്‍പ്പ്, 9ന് കൊടിയിറക്ക്, ആറാട്ട് അത്താഴമൂട്ട്.