കല്പ്പറ്റ : മാനന്തവാടി ജില്ലാ ആശുപത്രിക്ക് സമീപം പ്രവര്ത്തിക്കുന്ന ജില്ലാ മെഡിക്കല് ഓഫീസ് ജില്ലാ ആസ്ഥാനമായ കല്പ്പറ്റയിലേക്ക് പറിച്ചുനടാനുള്ള നീക്കം. എന്തുവിലകൊടുത്തും ചെറുക്കുമെന്ന് ബിജെപി ജില്ലാ കമ്മിറ്റി. ഓഫീസ് മാറ്റാനുള്ള നീക്കങ്ങള് അതീവ രഹസ്യമായാണ് നടത്തിയത്. മെഡിക്കല് ഓഫീസറുടെ തസ്തിക ഒഴിഞ്ഞുകിടക്കുന്നതിനാല് ചാര്ജ്ജുള്ള ഒരു വിഭാഗം ജീവനക്കാരാണ് മാറ്റത്തിന് പിന്നില്. ഇവര്ക്ക് കല്പ്പറ്റ എം.എല്.എയുടെയും ഭരണാനുകൂല സര്വ്വീസ് സംഘടനയുടെയും പിന്തുണ കൂടി ഉണ്ട്. ഓഫീസ് മാറാനുള്ള നടപടി ക്രമങ്ങള് ദ്രുതഗതിയില് പൂര്ത്തിയാക്കായിതായി അറിയുന്നു. വിവരം ഡി.എം. ഓഫീസിലെ താഴെ കിടയിലെ ജീവനക്കാര് അറിയാതിരിക്കാന് അതീവ രഹസ്യമായാണ് ഫയലുകള് നീക്കിയത്. കല്പ്പറ്റ ഗവ.ആശുപത്രി പ്രവര്ത്തിച്ചിരുന്ന കെട്ടിടത്തിലേക്ക് ഡി.എം.ഒ.ഓഫീസ് മാറ്റാനാണ് തീരുമാനം. സ്ഥലം ആരോഗ്യ വകുപ്പിലെ ജില്ലയിലെ ഉന്നതര് കണ്ട് തൃപ്തരാവുകയും ചെയ്തു.
മുന് മന്ത്രി പി.കെ.ജയലക്ഷ്മിയുടെ ആസ്തി വികസന ഫണ്ടില് നിന്നും കെട്ടിട നിര്മ്മാണത്തിന് 70ലക്ഷം രൂപ അനുവദിക്കുകയും പൊതുമരാമത്ത് കെട്ടിടവിഭാഗം എസ്റ്റിമേറ്റ് തയ്യാറാക്കി ഭരണാനുമതിക്കായി സമര്പ്പിച്ചിരിക്കുകയാണ്. ഇതിനിടയിലാണ് ഓഫീസ് ഇളക്കി പ്രതിഷ്ഠിക്കുന്നത്. ചിലവ് ചുരുക്കലും പുതിയ കെട്ടിടം നിലവിലെ സ്ഥലത്ത് നിര്മ്മിക്കുന്നതിന് പുരാവസ്തു വകുപ്പിന്റെ തടസ്സവുമാണ് ഓഫീസ് മാറ്റുന്നതിന് മുന്കൈ എടുക്കുന്നവരുടെ വാദം. എന്നാല് ജില്ലാ ആശുപത്രിയിലെത്തുന്ന ആദിവാസികളുള്പ്പെടെയുള്ള സാധാരണക്കാര് ചികിത്സാ നിഷേധം ഉണ്ടായാലും ജില്ലാ ആശുപത്രയുടെ ദൈനംദിന വിഷയങ്ങളില് ഇടപെടാനും ഡി എംഒ ഓഫീസ് ഇവിടെത്തന്നെ നിലനിര്ത്തണമെന്നായിരുന്നു നേരത്തെ ഇത്തരത്തില് ഒരുനീക്കം നടത്തിയപ്പോള് യുവമോര്ച്ച പോലെയുള്ള സംഘടനകളുള്പ്പെടെ ആവശ്യപ്പെട്ടിരുന്നത്. സ്ഥലം എംഎല്എ ഉള്പ്പെടെയുള്ളവരുടെ താല്പ്പര്യത്തിന് വഴങ്ങിയാണ് ഓഫീസ് മാറ്റം.
യോഗത്തില് ബിജെപി ജില്ലാ പ്രസിഡന്റ് സജി ശങ്കര് അദ്ധ്യക്ഷത വഹിച്ചു. ജില്ലാ ജനറല്സെക്രട്ടറിമാരായ പി.ജി.ആനന്ദ്കുമാര്, കെ.മോഹന്ദാസ്, ജില്ലാ ട്രഷറര് വി.കേശവനുണ്ണി തുടങ്ങിയവര് പ്രസംഗിച്ചു.
