ചേര്‍ത്തല: താലൂക്കിലെ അനധികൃത പടക്ക നിര്‍മ്മാണ കേന്ദ്രങ്ങളില്‍ പൊലീസ് റെയ്ഡ്. വന്‍ പടക്കശേഖരം പിടികൂടി. അഞ്ചു പേരെ പിടികൂടി. മുനിസിപ്പല്‍ 27-ാം വാര്‍ഡ് നെയ്‌പ്പള്ളവെളി ബിജു(40), 22-ാം വാര്‍ഡ് കുന്നത്തുവെളി ബിജു(38) എന്നിവരാണ് ചേര്‍ത്തലയില്‍ പിടിയിലായത്. തുറവൂര്‍ പഞ്ചായത്ത് 12-ാം വാര്‍ഡ് വട്ടത്തറ അനില്‍കുമാര്‍(49), 10-ാം വാര്‍ഡ് കിഴക്കോലില്‍ മോഹനന്‍പിള്ള(49), പുറത്തുവേലിവീട്ടില്‍ രാധാകൃഷ്ണന്‍(46) എന്നിവരെയാണ് കുത്തിയതോട് സിഐ കെ.ആര്‍. മനോജ്, എസ്‌ഐ എ.എല്‍. അഭിലാഷ് എന്നിവരുടെ നേതൃത്വത്തില്‍ പിടികൂടിയത്.
ചേര്‍ത്തലയില്‍ നടന്ന റെയ്ഡില്‍ നാല് ചാക്ക് പടക്കം, കരിമരുന്ന്, വെടിയുപ്പ്, പനയോല, കയര്‍ എന്നിവ കണ്ടെടുത്തു. ഉടമസ്ഥരില്ലാതെ വിവിധ കേന്ദ്രങ്ങളില്‍ സൂക്ഷിച്ചിരുന്ന പടക്കശേഖരവും സിഐ ടോമി സെബാസ്റ്റ്യന്‍, എസ്‌ഐ വി. സൈജു എന്നിവരുടെ നേതൃത്വത്തില്‍ കണ്ടെടുത്തു. തുറവൂര്‍ വളമംഗലം മേഖലയില്‍ നടത്തിയ പരിശോധനയില്‍ ഓലപ്പടക്കം, കരിമരുന്ന്, തിരി, ഗന്ധകം, പൗഡര്‍, ഗുണ്ട്, പാളിപ്പടക്കം എന്നിവ പിടിച്ചെടുത്തു.അനധികൃത പടക്ക നിര്‍മ്മാണം നടക്കുന്നതായുള്ള വിവരത്തെ തുടര്‍ന്ന് പൊലീസ് സമീപ പ്രദേശത്തെ നിരവധി വീടുകളില്‍ പരിശോധന നടത്തി. കൊല്ലം പരവൂരിലെ വെടിക്കെട്ട് ദുരന്തത്തിന്റെ പശ്ചാത്തലത്തിലായിരുന്നു റെയ്ഡ്. പിടിയിലായവര്‍ക്ക് ലൈസന്‍സ് ഇല്ലെന്നും 5 കേസുകള്‍ രജിസ്റ്റര്‍ ചെയ്തതായും പോലീസ് പറഞ്ഞു
