കോട്ടയം: ഡോക്ടര്‍ ചമഞ്ഞ് മെഡിക്കല്‍ കോളേജ് ആശുപത്രി വാര്‍ഡുകളില്‍ രോഗികളെ പരിശോധിക്കുന്ന യുവാവ് പിടിയില്‍. മാവേലിക്കര സ്വദേശി ധനീഷാണ് (25) ഗാന്ധിനഗര്‍ പോലിസിന്റെ പിടിയിലായത്. ഒരാഴ്ചയായി യുവാവ് 24ാം വാര്‍ഡിലെത്തി പരിശോധന നടത്തിയിരുന്നു. പരിശോധനയില്‍ സംശയം തോന്നിയ രോഗികള്‍ ഈ വിവരം ആസ്പത്രിയിലെ ജീവനക്കാരേയും ഹെഡ്‌നേഴ്‌സിനേയും അറിയിച്ചു. ഇന്നലെ ഉച്ചയോടെ രോഗികളെ പരിശോധിക്കാന്‍ ശ്രമിക്കുന്നതിനിടെയാണ് യുവാവ് പിടിയിലായത്. വാര്‍ഡുകളില്‍ ഡോക്ടര്‍മാരുടെ റൗണ്ട്‌സിന് ശേഷം യുവാവെത്തി രോഗികളെ പരിശോധിക്കുന്നത് പതിവാക്കുകയായിരുന്നു. ഇന്നലെ രോഗികളെ പരിശോധിക്കാന്‍ എത്തിയപ്പോള്‍ വാര്‍ഡിലുണ്ടായിരുന്നവര്‍ ആശുപത്രി ജീവനക്കാരെ അറിയിച്ചു. തുടര്‍ന്ന് സെക്യൂരിറ്റി ജീവനക്കാര്‍ ഇയാളെ പിടികൂടി ആശുപത്രി എയ്ഡ് പോസ്റ്റിലെ പോലിസുകാര്‍ക്ക് കൈമാറി. ചോദ്യം ചെയ്യലിനുശേഷം ഇയാളെ ഗാന്ധിനഗര്‍ സ്റ്റേഷനിലേക്ക് കൊണ്ടുപോയി.തുടര്‍ന്ന് നടത്തിയ വിശദമായ ചോദ്യം ചെയ്യലില്‍ ഇന്‍സ്ട്രമെന്റേഷന്‍ പഠനം നടത്തിയയാളാണ് യുവാവെന്ന് കണ്ടെത്തി.
ഡോക്ടര്‍ ചമഞ്ഞ് രോഗികളെ പരിശോധിച്ച യുവാവ് പിടിയില്‍
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.