ചേര്‍ത്തല: ആഡംബരജീവിതത്തിനായി മോഷണം നടത്തുന്ന സംഘത്തെ പോലീസ് അറസ്റ്റ് ചെയ്തു. ചേര്‍ത്തല നഗരസഭ 15-ാം വാര്‍ഡ് ഉഴുവേലി അനൂപ് (32), ഗുരുവായൂര്‍ സരോവരം വാര്‍ഡ് കഴുവളപ്പില്‍ വാടകയ്‌ക്ക് താമസിക്കുന്ന ജിഷ്ണു (21), തൃശൂര്‍ വലപ്പാട്ട് സര്‍ക്കാര്‍ ആശുപത്രിക്ക് സമീപം ചാത്തൂര്‍വീട്ടില്‍ പ്രകാശന്‍ (35) എന്നിവരെയാണ് ചേര്‍ത്തല പോലീസ് പിടികൂടിയത്. നിരവധി മോഷണക്കേസുകളില്‍ പ്രതികളായ ഇവര്‍ മൂന്ന് പേരും ജയിലില്‍ വെച്ചാണ് പരിചയപ്പെട്ടത്. ജയിലില്‍ നിന്ന് പുറത്തിറങ്ങിയ ശേഷം സംസ്ഥാനത്തിന്റെ വിവിധഭാഗങ്ങളില്‍ മോഷണം നടത്തുകയായിരുന്നു ഇവര്‍. ഏതാനും മാസങ്ങള്‍ മുന്‍പ് ചേര്‍ത്തലയില്‍ മൂന്നോളം വീടുകളില്‍ മോഷണം നടത്തിയത് അനൂപിന്റെ നേതൃത്വത്തിലായിരുന്നു.
ഇതിനിടെ ചേര്‍ത്തല നഗരസഭ 17-ാം വാര്‍ഡ് പുത്തന്‍പറമ്പില്‍ രാമചന്ദ്രന്റെ വീട്ടില്‍ മോഷണം നടത്തുവാന്‍ ശ്രമിച്ചെങ്കിലും വിജയിച്ചില്ല. ചേര്‍ത്തല കൂട്ടുങ്കല്‍ മരിയാദാസിന്റെ വീട്ടില്‍ നിന്ന് 15 പവനും, അയ്യായിരം രൂപയും, അയ്യായിരം രൂപയുടെ വിദേശ കറന്‍സിയും ഇവര്‍ മോഷ്ടിച്ചിരുന്നു. മൊബൈല്‍ ടവറുകള്‍ കേന്ദ്രീകരിച്ച് നടന്ന അന്വേഷണത്തിലാണ് ഇവര്‍ ചെര്‍ത്തല പോലീസിന്റെ പിടിയിലായത്. ആഡംബര വാഹനത്തിലായിരുന്നു ഇവരുടെ കറക്കം. വാഹന ഉടമയെ കുറിച്ചും ന്വേഷിക്കുന്നുണ്ടെന്ന് സിഐ: വി.എസ്. നവാസ് പറഞ്ഞു.
