കൊച്ചി: കൊച്ചി മെട്രോ റെയില് മുട്ടം യാര്ഡിന്റെ നിര്മ്മാണവുമായി ബന്ധപ്പെട്ട് ഉയര്ന്ന പ്രശ്നങ്ങള് പരിഹരിക്കാന് മുഖ്യമന്ത്രിയുടെ അധ്യക്ഷതയില് ചേര്ന്ന യോഗത്തില് ധാരണ. അന്വര് സാദത്ത് എംഎല്എ, ആലുവ-കളമശ്ശേരി നഗരസഭാ ചെയര്മാന്മാര്, ജില്ലാ കളക്ടര് തുടങ്ങിയവര് പങ്കെടുത്ത യോഗത്തിലാണ് ധാരണയായത്. യാര്ഡ് നിര്മ്മാണം നടക്കുന്ന ഭൂമിക്ക് സമീപം ഡ്രെയിനേജിനായി പുതിയ കനാലുകള് സ്ഥാപിക്കും. കിഴക്കുഭാഗത്ത് ഇപ്പോഴുള്ള കനാല് ആഴംകൂട്ടി വൃത്തിയാക്കും.
നിലവിലുള്ള മടത്താഴം ഹരിജന് കോളനി റോഡ് പുനര്നിര്മ്മിക്കും. കുന്നത്തേരി, വടക്കുഴ പ്രദേശത്തെ വീടുകള്ക്ക് യാര്ഡ് നിര്മാണത്തിനിടെയുണ്ടായ കേടുപാടുകള്ക്ക് പരിഹാരം കാണും. കുടിവെള്ള വിതരണത്തിനുള്ള പൈപ്പ്ലൈന് മാറ്റിസ്ഥാപിക്കും. കമ്പനിപ്പടി ബസ്സ്റ്റോപ്പില് പുതിയ ബസ് ഷെല്ട്ടര് നിര്മ്മാണം പൂര്ത്തിയാക്കും തുടങ്ങിയയാണ് ധാരണകള്. മുഖ്യമന്ത്രി ചെയര്മാനായ സമിതി ഇടക്കിടെ യോഗം ചേര്ന്ന് സ്ഥിതിഗതികള് വിലയിരുത്തുമെന്നും തീരുമാനമായി.
