പാലാ: സാമുഹ്യനീതി അട്ടിമറിക്കപ്പെടുന്ന കേരളത്തില്‍ മതത്തിന്റെ അടിസ്ഥാനത്തിലുള്ള സാമൂഹ്യ- സാമ്പത്തിക സര്‍വ്വേ നടത്തണമെന്ന് ഹിന്ദു ഐക്യവേദി സംസ്ഥാന പ്രസിഡന്റ് കെ.പി. ശശികലടീച്ചര്‍ ആവശ്യപ്പെട്ടു. ഇവിടുത്തെ ബഹുഭൂരിപക്ഷം വിദ്യാഭ്യാസ സ്ഥാപനങ്ങളും ആശുപത്രികളും മതന്യൂനപക്ഷങ്ങളുടെ കയ്യിലാണെന്നിരിക്കെ ഇത്തരമൊരു പഠനം അനിവാര്യമാണ്. ശ്രീനാരായണ ആര്‍ട്‌സ് ആന്റ് കള്‍ച്ചറല്‍ സൊസൈറ്റിയുടെ പരിപാടിയില്‍ സമൂഹ്യനീതി എന്ന വിഷയത്തില്‍ മുഖ്യപ്രഭാഷണം നടത്തുകയായിരുന്നു അവര്‍. സാമൂഹ്യനീതി എല്ലാവര്‍ക്കും ഒന്നുപോലെ ലഭിക്കണം. ജീവനില്ലാത്തവയ്‌ക്കു പോലും തുല്യ അവകാശമുണ്ട്. ഇന്ന് കേരളത്തിലും ഭാരതത്തിലും സാമൂഹ്യനീതി ലഭിക്കുന്നില്ല. ഇവിടെ ചില മാറ്റങ്ങള്‍ അനിവാര്യമാണെന്നും ശശികല ടീച്ചര്‍ പറഞ്ഞു.
സുപ്രീംകോടതിയില്‍ നിന്ന് അടുത്തകാലത്ത് ഒരു വിധി വന്നു. വിദ്യാഭ്യാസ അവകാശ നിയമം ന്യൂനപക്ഷസ്ഥാപനങ്ങള്‍ക്ക് ബാധകമല്ല എന്ന്. കേരളത്തെയാണ് ഈ വിധി ഏറ്റവും ദോഷകരമായി ബാധിക്കുന്നത്. ഇവിടുത്തെ ഭൂരിപക്ഷം വിദ്യാഭ്യാസ സ്ഥാപനങ്ങളും ന്യൂനപക്ഷങ്ങള്‍ക്കാണ്. സാമൂഹ്യനീതി ലഭിക്കണമെങ്കില്‍ ന്യൂനപക്ഷത്തെയും മതേതരത്വത്തെയും നിര്‍വ്വചിക്കേണ്ടിയിരിക്കുന്നു. അതിന് ഭരണഘടനയില്‍ മാറ്റം വരുത്തണം. ന്യൂനപക്ഷം എന്ന പദം ഏറെ തെറ്റിദ്ധരിക്കപ്പെടുന്നു. ഇവിടെ ഭാഷാന്യൂനപക്ഷവും മതന്യൂനപക്ഷവും ഉണ്ട്. ഭാഷാ ന്യൂനപക്ഷത്തെ സംസ്ഥാനാടിസ്ഥാനത്തിലും മതന്യൂനപക്ഷത്തെ രാജ്യാടിസ്ഥാനത്തിലും എടുത്തതോടെ ഇവിടെ സാമൂഹ്യനീതി അട്ടിമറിക്കപ്പെട്ടു. ഹിന്ദുക്കള്‍ ന്യൂനപക്ഷമായ നിരവധി സംസ്ഥാനങ്ങള്‍ ഇന്ത്യയിലുണ്ട്. അവിടെ ന്യൂനപക്ഷ പരിരക്ഷ അവര്‍ക്ക് കിട്ടുന്നില്ല.
മതമേതായാലും മനുഷ്യന്‍ നന്നായാല്‍ മതി എന്നാണ് ശ്രീനാരായണ ഗുരുദേവന്‍ പറഞ്ഞത്. ഇന്ന് അത് തിരിച്ചിട്ടു. മനുഷ്യനേതായാലും മതം നന്നായാല്‍ മതി എന്നാക്കി എന്നും ശശികലടീച്ചര്‍ പറഞ്ഞു.
മുനിസിപ്പല്‍ ടൗണ്‍ഹാളില്‍ നടന്ന സമ്മേളനത്തില്‍ സ്‌നാക്‌സ് പ്രസിഡന്റ് സത്യന്‍ പന്തത്തല അദ്ധ്യക്ഷത വഹിച്ചു. ദൈവദശകം വീഡിയോ സീഡിയുടെ പ്രകാശനം സനാക്‌സ് രക്ഷാധികാരി എന്‍. കൃഷ്ണന്‍കുട്ടിക്ക് കോപ്പി നല്‍കി ശശികലടീച്ചര്‍ നിര്‍വ്വഹിച്ചു. ജനറല്‍ സെക്രട്ടറി അഡ്വ. ഇ.എം. സുരേഷ്, കമ്മറ്റിയംഗം അനുരാഗ് പാണ്ടിക്കാട്ട് എന്നിവര്‍ പ്രസംഗിച്ചു.
