ചങ്ങനാശ്ശേരി: മാടപ്പള്ളി ഗ്രാമത്തിലെ വൃക്കരോഗികളായ വിഷ്ണുവിനും, ലിഡയ്‌ക്കും വേണ്ടി മാടപ്പള്ളിഗ്രാമവാസികളുടെ സ്‌നേഹം കൈകോര്‍ത്തു. ഇവരുടെ ശസ്ത്രക്രീയയ്‌ക്കായി ഗ്രാമജനത ഒരേമനസ്സോടെ 21 ലക്ഷത്തിലധികം രൂപയാണ് സ്വരൂപിച്ചത്. വൃക്കരോഗത്താല്‍ തളര്‍ന്ന് വൃക്കമാറ്റിവയ്‌ക്കല്‍ ശസ്ത്രക്രിയ്‌ക്ക് പണമില്ലാതെ വിഷമിച്ചു കഴിയുുന്ന വിഷ്ണുവിനും ലിഡയ്‌ക്കും വേണ്ടിയാണ് ഗ്രാമം കൈകോര്‍ത്തിറങ്ങിയത്. മാടപ്പള്ളി കളത്തില്‍ വീട്ടില്‍ മോഹനന്റെയും രാധയുടെയും മകനായ വിഷ്ണു കമ്പ്യൂട്ടര്‍ ജോലിചെയ്യവെ ഒരുവര്‍ഷം മുന്‍പാണ് വൃക്കരോഗം തുടങ്ങിയത്. അവിവാഹിതനായ വിഷ്ണുവിന് വൃക്ക പകുത്തുനല്‍കുന്നത് അമ്മ രാധയാണ്.
മാടപ്പള്ളി സാല്‍വേഷന്‍ ആര്‍മി ക്വാര്‍ട്ടേഴ്‌സില്‍ പാസ്റ്റര്‍ ജോബിന്റെ ഭാര്യ 24 വയസ്സുള്ള ലിഡയ്‌ക്ക് 3 വര്‍ഷം മുന്‍പാണ് വൃക്കരോഗം കലശലായത്. വൃക്ക മാറ്റിവയ്‌ക്കാതെ രോഗവിമുക്തി സാധ്യമല്ലെന്ന് ഡോക്ടമാര്‍ അറിയിച്ചതിനേ തുടര്‍ന്ന് വൃക്ക മാറ്റിവയ്‌ക്കല്‍ ശസ്ത്രക്രിയ കാത്തുകഴിയുകയായിരുന്നു ലിഡ. ലിഡയ്‌ക്ക് അച്ഛന്‍ ജോസഫ് ഡാനിയേല്‍ വൃക്ക പകുത്തു നല്‍കും. മാടപ്പള്ളി ഗ്രാമവാസികളായ ഈ വൃക്ക രോഗികള്‍ക്ക് ജീവന്‍ തിരിച്ചുനല്‍കുന്നതിന് വേണ്ടിയാണ് ഗ്രാമജനതയൊന്നാകെ നാട്ടിലിറങ്ങി ധനസമാഹരണം നടത്തിയത്. സാമ്പത്തിക പരാധീനതയനുഭവിക്കുന്ന ഇവരുടെ ജീവന്‍ രക്ഷിക്കുന്നതിന് മാടപ്പള്ളി ഗ്രാമത്തില്‍ ജീവന്‍ രക്ഷാസമിതി രൂപവത്ക്കരിച്ച് ചങ്ങനാശ്ശേരി മീഡിയാവില്ലേജിന്റെ പ്രത്യാശാ ടീം അംഗങ്ങള്‍ ഫാ. സെബാസ്റ്റ്യന്‍ പുന്നശേരിയുടെ നേതൃത്വത്തില്‍ ജനകീയ കൂട്ടായ്‌മയ്‌ക്ക് തുടക്കമിടുകയായിരുന്നു.
ഞായറാഴ്ച ജനകീയകൂട്ടായ്‌മയുടെ നേതൃത്വത്തില്‍ സമാഹരിച്ച പണം തെങ്ങണയിലുള്ള മാടപ്പള്ളി സര്‍വ്വീസ് സഹകരണബാങ്ക് ഓഡിറ്റോറിയത്തില്‍ ലിഡയുടെയും വിഷ്ണുവിന്റെയും ബന്ധുക്കള്‍ക്ക് കൈമാറി. ജനകീയ കൂട്ടായ്‌മയുടെ നേതൃത്വത്തിലുള്ള ധനസമാഹരണ പരിപാടികള്‍ക്ക് പഞ്ചായത്ത് പ്രസിഡന്റ് കെ. സുരേന്ദ്രനാഥ പണിക്കര്‍, ഫാ. സെബാസ്റ്റ്യന്‍ പുന്നശേരി, ജനറല്‍ കണ്‍വീനര്‍ ജയിംസ് പഴയചിറ, മുന്‍പഞ്ചായത്ത് പ്രസിഡന്റ് പി.എം. മോഹന്‍പിള്ള, ജാനമ്മപ്രസാദ്, ജോര്‍ജ്ജുകുട്ടി കൊഴുപ്പക്കളം, പി.കെ. മണിയമ്മ, പി.കെ. ശശി, പി.എം. ഷെഫീക്, നിഷ, ബിജു, റെജീന സജി, റ്റോനി പുളിക്കന്‍ എന്നിവര്‍ നേതൃത്വം നല്‍കി.
