കോട്ടയം: വീരശൈവര്ക്ക് കര്ണാടക മാതൃകയില് സംസ്ഥാനത്തും വിദ്യാഭ്യാസ സ്ഥാപനങ്ങള് തുടങ്ങുവാന് സഹായങ്ങള് ചെയ്യുമെന്ന് മന്ത്രി തിരുവഞ്ചൂര് രാധാകൃഷ്ണന്. ബസവസമിതി കോട്ടയം ജില്ലാ കമ്മറ്റിയുടെ നേതൃത്വത്തില് നടന്ന 891-ാമത് ബസവ ജയന്തിയും കായക ദിനാചരണവും ഉദ്ഘാടനം ചെയ്യുകയായിരുന്നു അദ്ദേഹം. ബസവേശ്വര ഭക്തന്മാരുടെയും മഠങ്ങളുടെയും കീഴിലുള്ള വിദ്യാഭ്യാസ സ്ഥാപനങ്ങള് ലോകപ്രശസ്തി ആര്ജ്ജിച്ചതാണെന്ന് അദ്ദേഹം പറഞ്ഞു.
കര്ണാടക ശ്രീരംഗപട്ടണം വീരശൈവചന്ദ്രവനം ആശ്രമം മഠാധിപതി ത്രിനേത്രമഹന്ത ശിവയോഗി അനുഗ്രഹപ്രഭാഷണം നടത്തി. ഫോക്ക്ലോര് അക്കാദമി പുരസ്കാര ജേതാവ് കുമാരനല്ലൂര് മണിയെ ത്രിനേത്ര മഹന്ത ശിവയോഗിയും ബസവസമിതി ജില്ലാ പ്രസിഡന്റ് എ.കെ. രജുവും ചേര്ന്ന് ആദരിച്ചു. എസ്എസ്എല്സി പരീക്ഷയില് ഉന്നതവിജയം നേടിയ വിദ്യാര്ത്ഥികളെ ചടങ്ങില് അനുമോദിച്ചു. ബസവേശ്വരന്റെ ജീവചരിത്രം പാഠ്യപദ്ധതിയില് ഉള്പ്പെടുത്തണമെന്ന് യോഗം ആവശ്യപ്പെട്ടു. സ്വാഗതസംഘം ചെയര്മാന് അനീഷ് എന്. പിള്ളയുടെ അദ്ധ്യക്ഷതയില് കൂടിയ സമ്മേളനത്തില് നഗരസഭാ ചെയര്മാന് എം.പി. സന്തോഷ്കുമാര്, ബസവസമിതി സംസ്ഥാന പ്രസിഡന്റ് കെ. പ്രസന്നകുമാര്, വീരശൈവസഭാ സീനിയര് വൈസ് പ്രസിഡന്റ് ഡി.പി. മധുസുതന്പിള്ള, ഹിന്ദുഐക്യവേദി ജില്ലാ സംഘടനാ സെക്രട്ടറി എ.റ്റി. തുളസീധരന്, സഭാ വൈസ് പ്രസിഡന്റ് കെ. ഗോപാലപിള്ള, ബസവസമിതി ജില്ലാ സെക്രട്ടറി പ്രമോദ് ശ്രീശിവം, അരുണ് ശശികുമാര് എന്നിവര് സംസാരിച്ചു.
