മെല്‍ബണ്‍: ഇന്ത്യക്കാരെ അധിക്ഷേപിച്ച്‌ വീണ്ടും ആസ്ട്രേലിയ. രാജ്യത്തെ ഒരു സൂപ്പര്‍മാര്‍ക്കറ്റിലേക്ക്‌ ജോലിക്കാരെ ക്ഷണിച്ചുകൊണ്ട്‌ പുറത്തിറങ്ങിയ പരസ്യം ഇന്ത്യക്കാരോ ഏഷ്യക്കാരോ അപേക്ഷിക്കേണ്ടതില്ലെന്ന മുന്നറിയിപ്പ്‌ നല്‍കിയതാണ്‌ പുതിയ വിവാദങ്ങള്‍ക്ക്‌ തുടക്കമിട്ടിരിക്കുന്നത്‌. കഴിഞ്ഞ ഞായറാഴ്ച സൈറ്റിലാണ്‌ ഈ പരസ്യം പ്രത്യക്ഷപ്പെട്ടത്‌. ഈസ്റ്റ്‌ ലാന്‍ഡ്സിലെ ‘കോള്‍സ്‌’ സൂപ്പര്‍മാര്‍ക്കറ്റിലേക്ക്‌ ജീവനക്കാരെ ക്ഷണിച്ചുകൊണ്ടാണ്‌ ‘ഗംട്രീ’ വെബ്സൈറ്റില്‍ പരസ്യം പ്രത്യക്ഷപ്പെട്ടതെന്ന്‌ പ്രാദേശിക വാര്‍ത്താചാനലുകള്‍ റിപ്പോര്‍ട്ട്‌ ചെയ്യുന്നു. എന്നാല്‍ സൂപ്പര്‍മാര്‍ക്കറ്റിനെതിരെ ജനങ്ങള്‍ ബഹിഷ്കരണ പ്രവര്‍ത്തനവുമായി രംഗത്തെത്തിയതോടെ സൈറ്റില്‍നിന്നും പരസ്യം നീക്കം ചെയ്തതായും റിപ്പോര്‍ട്ടുകള്‍ വ്യക്തമാക്കുന്നു.
അതേസമയം, പരസ്യം സംബന്ധിച്ച വാര്‍ത്തകള്‍ ‘കോള്‍സ്‌’ നിഷേധിച്ചു. കോള്‍സിന്റെ അറിവോടെയല്ല പരസ്യം പ്രസിദ്ധീകരിച്ചതെന്നും പരസ്യത്തിന്റെ ഉള്ളടക്കം പരിശോധിച്ചുവരികയാണെന്നും വക്താവ്‌ ജിം കൂപ്പര്‍ അറിയിച്ചു.
