ന്യൂദല്‍ഹി: ആര്‍എസ്എസ് സ്ത്രീകളെ ബഹുമാനിക്കുന്നാില്ലെന്ന രാഹുല്‍ ഗാന്ധിയുടെ പ്രസ്താവന നിസ്സാരവും തരംതാഴ്ന്നതുമാണെന്ന് ബിജെപി ദേശീയ ജനറല്‍ സെക്രട്ടറി സ്മൃതി ഇറാനി. “യൂണിഫോം ധരിച്ച ഒരു വനിതാ പോലീസ് ഉദ്യോഗസ്ഥയോട് അദ്ദേഹം ശാരീരികമായി മോശമായി പെരുമാറിയതിൽ നിന്ന് തന്നെ സ്ത്രീകളോടുള്ള അദ്ദേഹത്തിന്റെ മനോഭാവം വ്യക്തമാണെന്നും സ്മൃതി ഇറാനി ചൂണ്ടിക്കാട്ടി. ദസറ ആഘോഷത്തില്‍ പങ്കെടുത്ത ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു സ്മൃതി ഇറാനി.
ദല്‍ഹിയില്‍ കോണ്‍ഗ്രസിന്റെ മാര്‍ച്ചിനിടയിലാണ് പ്രിയങ്കഗാന്ധിയെ മാറ്റാന്‍ ചെന്ന വനിതാ പൊലീസ് ഉദ്യോഗസ്ഥയ്‌ക്കെതിരെ രാഹുല്‍ഗാന്ധി ബലപ്രയോഗം നടത്തിയത്. വനിതയാണ് എന്ന പരിഗണന നല്‍കാതെയായിരുന്നു രാഹുല്‍ ഗാന്ധിയുടെ ശാരീരിക ആക്രമണം. ഈ സംഭവമാണ് സ്മൃതി ഇറാനി സൂചിപ്പിച്ചത്.
ഇത്തരത്തിലുള്ള നിസ്സാരവും തരംതാഴ്ന്നതുമായ പരാമർശങ്ങൾ അദ്ദേഹം ആവർത്തിക്കുമ്പോൾ, ഇതിനെക്കുറിച്ച് സ്ത്രീകളോട് അഭിപ്രായം ചോദിക്കേണ്ട ആവശ്യമേയില്ലെന്നും സ്മൃതി ഇറാനി അഭിപ്രായപ്പെട്ടു. ഞങ്ങൾക്ക് ഒരു സാമൂഹിക ഉത്തരവാദിത്തമുണ്ട്; സ്ത്രീകളോട് ഇത്രയും പിന്തിരിപ്പൻ കാഴ്ചപ്പാട് പുലർത്തുന്ന ഒരാളെ മാറ്റിനിർത്തേണ്ടത് ഞങ്ങളുടെ കടമയാണെന്നും സ്മൃതി ഇറാനി പറ‍ഞ്ഞു. കോണ്‍ഗ്രസിന്റെ സുപ്രീംകോടതി മാര്‍ച്ചിനിടയില്‍ കോണ്‍ഗ്രസിന് വേണ്ടി പരിപാടി റിപ്പോര്‍ട്ട് ചെയ്യാനെത്തിയ ഗര്‍ഭിണിയായ ഒരു വനിതാ മാധ്യമപ്രവര്‍ത്തകയെ രാഹുല്‍ തള്ളിവീഴ്‌ത്തിയതും രാഹുല്‍ ഗാന്ധി സ്ത്രീകളെ എത്ര കരുതലില്ലാതെയാണ് കൈകാര്യം ചെയ്യുന്നത് എന്നതിന് ഉദാഹരണമാണ്.
ബി.ജെ.പിയിലായാലും ആർ.എസ്.എസ്സിലെ സ്വയംസേവികമാരായാലും, അവിടെ സ്ത്രീകൾ ശാക്തീകരിക്കപ്പെട്ടവരാണ്. വാസ്തവത്തിൽ, രാഹുല്‍ ഗാന്ധി ഇത്തരം നിസ്സാരവും തരംതാഴ്ന്നതുമായ പരാമർശങ്ങൾ നടത്തുമ്പോൾ അത് സമൂഹത്തിലെ എല്ലാ തുറകളിലുമുള്ള സ്ത്രീകളെയും അപമാനിക്കുന്നതിന് തുല്യമാണ്. വാർത്തകളിൽ നിറഞ്ഞുനിൽക്കാൻ വേണ്ടി മാത്രമാണ് പ്രതിപക്ഷ നേതാവായ രാഹുൽ ഗാന്ധി ഇത്തരത്തിലുള്ള വിലകുറഞ്ഞ പരാമർശങ്ങൾ നടത്തുന്നതെന്ന് തോന്നുന്നു.- സ്മൃതി ഇറാനി ചൂണ്ടിക്കാട്ടി.
