കൊല്ലം: ശക്തികുളങ്ങര ഹാര്‍ബറിലെ ശുചിമുറി ടാങ്കില്‍ മൃതദേഹാവശിഷ്ടങ്ങള്‍ കണ്ടെത്തിയ സംഭവം കൊലപാതകം.കൊല്ലപ്പെട്ടത് ചവറ കൊട്ടുകാട് സ്വദേശി നിസാര്‍ (55).സംഭവത്തില്‍ കൊട്ടിയം സ്വദേശി ശ്യാംജിത്തിനെ പൊലിസ് അറസ്റ്റ് ചെയ്തു.
നിസാറിനെ കൊലപ്പെടുത്തി മൃതദേഹം ടാങ്കില്‍ തള്ളിയെന്ന് പ്രതി ചോദ്യം ചെയ്യലില്‍ സമ്മതിച്ചു. ഇയാളെ സംഭവസ്ഥലത്തെത്തിച്ച് തെളിവെടുപ്പ് നടത്തി.
കഴിഞ്ഞ മാസം 30 ന് ഹാര്‍ബറിലെ ശുചിമുറി മാലിന്യം നീക്കാന്‍ സ്ലാബ് തുറന്നപ്പോഴാണ് തൊഴിലാളികള്‍ മൃതദേഹ അവശിഷ്ടങ്ങള്‍ ആദ്യം കണ്ടത്. ജീര്‍ണിച്ച നിലയിലായിരുന്നതിനാല്‍ ആദ്യം മൃഗത്തിന്റെതെന്നാണ് കരുതിയത്. എന്നാല്‍ വെറ്ററിനറി സര്‍ജനെത്തി പരിശോധിച്ചപ്പോള്‍ മൃഗത്തിന്റേതല്ലെന്ന് വ്യക്തമായി. തുടര്‍ന്ന് നടത്തിയ തെരച്ചിലില്‍ തലയോട്ടിയും കിട്ടി.
കൊല്ലപ്പെട്ട നിസാര്‍ ഹാര്‍ബറിലെ ശുചിമുറികള്‍ വാടകയ്‌ക്ക് എടുത്തിരുന്നയാളാണ് . ഇയാള്‍ അവിടെത്തന്നെയാണ് താമസിച്ച് വന്നിരുന്നത്. ഹാര്‍ബറിലെ ശുചിമുറിയുടെ കരാര്‍ എടുത്തിരുന്നയാളുടെ ഡ്രൈവറായിരുന്നു അറസ്റ്റിലായ ശ്യാംജിത്ത്. സംഭവദിവസം നിസാര്‍ തന്നെ അസഭ്യം വിളിച്ചതിനെ തുടര്‍ന്ന് പ്രതി, നിസാറിനെ ആദ്യം മര്‍ദിക്കുകയും പിന്നീട് ശുചിമുറിയില്‍ ഉണ്ടായിരുന്ന കമ്പി ഉപയോഗിച്ച് തലയ്‌ക്കടിച്ച് കൊലപ്പെടുത്തുകയുമായിരുന്നു.
പിന്നാലെ മൃതദേഹം പായയില്‍ പൊതിഞ്ഞ് സമീപത്തെ ടാങ്കിന്റെ മൂടി തുറന്ന് അതിലേക്ക് തള്ളുകയായിരുന്നു. കൊലപാതകത്തിന് ശേഷവും ഇയാള്‍ ജോലി തുടര്‍ന്നു. സിസിടിവി ദൃശ്യങ്ങളും മറ്റ് ശാസ്ത്രീയ തെളിവുകളും കേന്ദ്രീകരിച്ചുളള അന്വേഷണത്തിലാണ് ശ്യാംജിത്ത് പിടിയിലായത്.
