കൊച്ചി: ഒരു മാസം ശ്രമിച്ചാ ഇന്ത്യന്‍ പ്രധാനമന്ത്രിയുടെ വരെ കൂടിക്കാഴ്ച നടത്താന്‍ കഴിയുന്ന നമ്മുടെ രാജ്യത്ത്..ഷറഫുദ്ദീന്‍ എന്ന നടനെ രണ്ടു മാസമായി തനിക്ക് ഫോണില്‍ പോലും കിട്ടുന്നില്ലെന്ന പരാതിയുമായി സംവിധായകന്‍ ഒമര്‍ ലുലു. സമൂഹമാധ്യമത്തില്‍ പങ്കുവെച്ച കുറിപ്പിലായിരുന്നു അല്‍പം പരിഹാസച്ചുവയോടെയുള്ള ഈ പരാതി പറച്ചില്‍. ഷറഫുവിനെ നായകനാക്കി ഒരു പുതിയ സിനിമ ചെയ്യുകയായിരുന്നുവെന്നും സ്ക്രിപ്റ്റ് 80 ശതമാനം പൂര്‍ത്തിയാക്കിയെന്നും എന്നാല്‍ കഴിഞ്ഞ രണ്ട് മാസമായി ഫോണില്‍ വിളിച്ചിട്ടും ഷറഫു ഫോണെടുക്കുന്നില്ലെന്നും ആണ് ഒമര്‍ ലുലു പറയുന്നത്.
ഒമര്‍ ലുലുവിന്റെ കുറിപ്പിലേക്ക്:
“ഷറഫേ, നീ ഫ്രീയാകുമ്പോൾ ഒന്ന് വിളിക്ക്. ഞങ്ങൾ ഒന്നിച്ച 100 ദിവസം ഓടിയ Happy Wedding എന്ന സിനിമയ്‌ക്ക് ശേഷം ഞാന്‍ ഷറഫുദ്ദീനുമായി വർക്ക് ചെയ്‌തിട്ട്.വര്‍ഷങ്ങള്‍ കഴിഞ്ഞു.
രണ്ട് പുതിയ പയ്യൻമാർ വന്ന് പറഞ്ഞ കഥ കേട്ടപ്പോൾ, ഈ കഥാപാത്രം ഷറഫ് ചെയ്താൽ നന്നായിരിക്കുമെന്ന് എനിക്ക് തോന്നി,അങ്ങനെ 6 വർഷത്തിന് ശേഷം ഞാന്‍ ഷറഫിനെ വിളിച്ചു..
കഥയുടെ ഏകദേശം പകുതിയിലധികം എഴുത്ത് പൂർത്തിയായ സമയമായിരുന്നു. സ്ക്രിപ്റ്റ് വായിച്ചിട്ട് പറയാമെന്ന് ഷറഫ് പറഞ്ഞു. ഞാൻ ബാക്കി എഴുത്തുമായി മുന്നോട്ടുപോയി.ഇതിനിടക്ക് ഒരു തവണ ഷറഫിനെ വിളിച്ചു കാണാൻ പ്ളാൻ ചെയ്തു പക്ഷേ ഒന്നും കൂടി സ്ക്രിപ് റ്റ് നന്നാക്കിയിട്ട് കാണാമെന്ന് ഞാന്‍ വിചാരിച്ചു..
പക്ഷേ ഇപ്പോൾ സ്ക്രിപ്പ്റ്റ് 80% കഴിഞ്ഞു ഇനി ആർട്ടിസ്റ്റിനെ കൺഫോം ചെയ്തു വേണം സ്ക്രിപ്പ്റ്റ് complete ചെയ്യാൻ. എന്നാൽ ഷറഫ് വിളിച്ചാൽ ഫോൺ എടുക്കുന്നില്ല രണ്ട് മാസമായി!
ഒരു മാസം ശ്രമിച്ചാ പ്രധാനമന്ത്രിയുടെ appointment വരെ കിട്ടുന്ന നമ്മുടെ രാജ്യത്ത്..
എന്തായാലും ഷറഫേ, നീ ഫ്രീയാകുമ്പോൾ ഒന്ന് വിളിക്ക്. കഥ പറയാനാണ്, അല്ലാതെ കല്യാണം വിളിക്കാനല്ല!
