ജമ്മു -കശ്മീര് മുഖ്യമന്ത്രി ഒമര് അബ്ദുള്ളയുടെയും നാഷണല് കോണ്ഫറന്സ് അധ്യക്ഷന് ഫാറൂഖ് അബ്ദുള്ളയുടെയും സാന്നിധ്യത്തില് ശ്രീനഗറില് നടന്ന ജമ്മു -കശ്മീര് അന്താരാഷ്ട്ര ചലച്ചിത്രമേളയില് ദേശീയഗീതമായ വന്ദേമാതരം പൂര്ണരൂപത്തില് ആലപിച്ചത്, കോണ്ഗ്രസ് നേതൃത്വം നല്കുന്ന ഇന്ഡി മുന്നണിയെ വെട്ടിലാക്കിയിരിക്കുകയാണ്. ചലച്ചിത്രമേളയുടെ ഉദ്ഘാടന വേദിയില് വന്ദേമാതരത്തിലെ എല്ലാ വരികളും ആലപിച്ചതാണ് കോണ്ഗ്രസിനെ പ്രകോപിപ്പിച്ചത്. ആദ്യത്തെ രണ്ട് ചരണങ്ങള് മാത്രം ആലപിക്കുകയെന്ന പാര്ട്ടിയുടെ ഔദ്യോഗിക നിലപാട് ചൂണ്ടിക്കാട്ടിയ കോണ്ഗ്രസ്, തങ്ങളുടെ സഖ്യകക്ഷിയായ നാഷണല് കോണ്ഫറന്സും ആ രീതി തുടരണമെന്ന് ആവശ്യപ്പെടുകയായിരുന്നു. എന്നാല് ഈ ആവശ്യം തള്ളിക്കളഞ്ഞ ഒമര് അബ്ദുള്ള, ദേശീയ ഗീതം ആലപിക്കുന്നതുമായി ബന്ധപ്പെട്ട് രാജ്യത്താകെ പ്രാബല്യത്തിലുള്ള കര്ശന നിയമങ്ങള് കോണ്ഗ്രസിനെ ഓര്മ്മിപ്പിച്ചു.
വന്ദേമാതരം ആലപിക്കുന്നതുമായി ബന്ധപ്പെട്ട് ഇന്ഡി മുന്നണിയിലെ സഖ്യകക്ഷിയായ കോണ്ഗ്രസിന്റെ ‘ഉപദേശ’ത്തിനെതിരെ രൂക്ഷമായ വിമര്ശനമാണ് മുഖ്യമന്ത്രി ഒമര് അബ്ദുള്ള നടത്തിയത്. ഈ വിഷയത്തിന്റെ പേരില് കശ്മീരിലെ ജനങ്ങള് ജയിലില് പോകണമെന്നാണോ കോണ്ഗ്രസ് ആഗ്രഹിക്കുന്നതെന്നാണ് അദ്ദേഹം രോഷത്തോടെ ചോദിച്ചത്. ഇത് ഇന്ഡി സഖ്യത്തിനുള്ളില് വലിയ വാഗ്വാദങ്ങള്ക്ക് വഴിവെച്ചു. കോണ്ഗ്രസിന്റെ എതിര്പ്പ് നാഷണല് കോണ്ഫറന്സ് പൂര്ണമായും തള്ളി. സഖ്യകക്ഷിയാണെങ്കിലും വന്ദേ മാതരം ആലപിക്കണമോയെന്നും, അതിന്റെ എത്ര ഭാഗം ആലപിക്കണമെന്നുമുള്ള കാര്യം തീരുമാനിക്കാന് കോണ്ഗ്രസിന് അധികാരമില്ലെന്നാണ് നാഷണല് കോണ്ഫറന്സ് നേതാവ് ബഷീര് അഹമ്മദ് പറഞ്ഞത്.
ശ്രീനഗറില് വന്ദേമാതരം പൂര്ണ്ണമായി ചൊല്ലിയതിനെ വിമര്ശിച്ച കോണ്ഗ്രസ് നേതാവ് കെ.സി. വേണുഗോപാലിനെ പരിഹസിക്കാനും നാഷണല് കോണ്ഫറന്സ് മറന്നില്ല. സോഷ്യല് മീഡിയയില് തന്റെ അഭിപ്രായങ്ങള് പ്രകടിപ്പിക്കാന് വേണുഗോപാലിന് അവകാശമുണ്ടെന്നും, എന്നാല് സ്വന്തം തീരുമാനം മറ്റുള്ളവരുടെ മേല് അടിച്ചേല്പ്പിക്കാന് കഴിയില്ലെന്നും അഹമ്മദ് പറഞ്ഞതോടെ തങ്ങളുടെ പാര്ട്ടി തീരുമാനങ്ങളില് കോണ്ഗ്രസ് ഇടപെടേണ്ടതില്ലെന്ന ശക്തമായ മുന്നറിയിപ്പാണ് ആ പാര്ട്ടി നല്കിയിരിക്കുന്നത്.
കോണ്ഗ്രസ് അംഗീകരിച്ചിട്ടുള്ള വന്ദേമാതരം പതിപ്പാണ് ആലപിക്കേണ്ടതെന്ന് വേണുഗോപാല് പറഞ്ഞിരുന്നു. സാമുദായിക വ്യാഖ്യാനം നല്കുന്നത് തടയുന്നതിനാണ് വെട്ടിച്ചുരുക്കിയ പതിപ്പ് മനഃപൂര്വം തിരഞ്ഞെടുത്തതെന്ന വേണുഗോപാലിന്റെ വാദവും നാഷണല് കോണ്ഫറന്സ് തള്ളി. ഈ സാഹചര്യം ഇന്ഡി മുന്നണിയുടെ നിലനില്പ്പിനു പോലും വെല്ലുവിളി ഉയര്ത്തുകയാണ്.
ദേശസ്നേഹത്തിന് നിരക്കാത്ത കോണ്ഗ്രസിന്റെ നിലപാടിനെതിരെ ബിജെപി രംഗത്തെത്തുകയും ചെയ്തു. കോണ്ഗ്രസിന്റെ നിലപാട് ഇരുപത്തിയൊന്നാം നൂറ്റാണ്ടിലെ പുതിയ മുസ്ലിം ലീഗായി ആ പാര്ട്ടിയെ മാറ്റിയിരിക്കുകയാണെന്ന് ബിജെപി എംപി സുധാംശു ത്രിവേദി വിമര്ശിച്ചു. പാകിസ്ഥാന് വാദികളായ മുസ്ലിം ലീഗിനെ പ്രീണിപ്പിക്കാന് വേണ്ടിയാണ് കോണ്ഗ്രസ് സമ്മേളനത്തില് വന്ദേമാതരം പൂര്ണമായി ആലപിക്കേണ്ടതില്ലെന്ന് ജവഹര്ലാല് നെഹ്റു മുന്കൈയെടുത്ത് തീരുമാനിച്ചത്. വന്ദേമാതരം പൂര്ണമായും ചൊല്ലണമെന്നും, അങ്ങനെ ചെയ്യാതിരിക്കുന്നത് ശിക്ഷാര്ഹമാണെന്നുമുള്ള നിയമം പ്രാബല്യത്തില് വന്നിട്ടും മുസ്ലിം വോട്ടു ബാങ്കിനെ പ്രീണിപ്പിക്കാന് പഴയ നിലപാട് ആവര്ത്തിക്കുകയാണ് കോണ്ഗ്രസ്. എഐസിസി ആസ്ഥാനത്ത് വന്ദേമാതരം പൂര്ണമായി ആരംഭിക്കുന്നത് പാര്ട്ടി നേതാവ് സോണിയ തടസ്സപ്പെടുത്തിയത് വലിയ വിവാദമായിരുന്നു. ഈ നിലപാട് സഖ്യകക്ഷികള് പോലും അംഗീകരിക്കുന്നില്ലെന്നാണ് നാഷണല് കോണ്ഗ്രസിന്റെ തീരുമാനം തെളിയിക്കുന്നത്.
