പയ്യന്നൂര്‍: ജനസംഘത്തിന്റെയും പിന്നീട് ബിജെപിയുടേയും കേരളത്തിലെ വളര്‍ച്ചയ്‌ക്ക് അടിത്തറ പാകിയ പ്രമുഖ നേതാക്കളില്‍ ഒരാളായ കെ.ജി. മാരാര്‍ക്ക് കണ്ണൂര്‍ പയ്യാമ്പലത്തെ അദ്ദേഹത്തിന്റെ അന്ത്യവിശ്രമ സ്ഥലത്ത് മനോഹരമായ സൃമൃതി മണ്ഡപവും ശില്‍പവുമൊരുങ്ങുന്നു.
1934 സപ്തംബര്‍ 17ന് കണ്ണൂര്‍ ജില്ലയിലെ നണിയൂരില്‍ ജനിച്ച അദ്ദേഹം പറശ്ശിനിക്കടവ് സ്‌കൂളില്‍ അദ്ധ്യാപകനായി ജോലി ചെയ്തിരുന്നു. പിന്നീട് അദ്ധ്യാപകവൃത്തി ഉപേക്ഷിച്ച് സാമൂഹിക-രാഷ്‌ട്രീയ പ്രവര്‍ത്തനങ്ങളില്‍ സജീവമായ മാരാര്‍ജി കേരളത്തില്‍ അങ്ങോളമിങ്ങോളം തന്റെ നര്‍മരസത്തില്‍ ചാലിച്ച പ്രസംഗ ചാരുതയിലൂടെയും വിട്ടുവീഴ്ചയില്ലാത്ത സംഘടനാപാടവത്തിലൂടെയും ജനമനസ്സില്‍ ഇടം നേടി. പയ്യാമ്പലത്തെ കാലപ്പഴക്കം കൊണ്ട് മോശമായ സമൃതി മണ്ഡപം രൂപകല്പന ചെയ്ത് പുതുക്കി പണിയുന്നത് പ്രശസ്ത ശില്‍പി ഉണ്ണികാനായിയാണ്.
പന്ത്രണ്ട് അടി ഉയരത്തില്‍ പുതിക്കി പണിയുന്ന സമൃതി മണ്ഡപത്തില്‍ സ്ഥാപിക്കാന്‍ മൂന്നര അടി ഉയരത്തില്‍ മാരാര്‍ജിയുടെ ശില്‍പം ശില്‍പി ഉണ്ണികാനായിയുടെ കാനായിലെ പണിപ്പുരയില്‍ ഒരുങ്ങുന്നത് കളിമണ്ണ് ശില്‍പം വിലയിരുത്താന്‍ ബിജെപി കണ്ണൂര്‍ നോര്‍ത്ത് ജില്ലാ പ്രസിഡന്റ് കെ.കെ. വിനോദ് കുമാര്‍ ജില്ലാ ജനറല്‍ സെക്രട്ടറി ടി.സി. മനോജ്, ബിജെപി കോഴിക്കോട് മേഖലാ സെക്രട്ടറി പനക്കീല്‍ ബാലകൃഷ്ണന്‍, ജില്ലാ കമ്മറ്റി അംഗം കൈതപ്രം ശങ്കരന്‍ നമ്പൂതിരി എന്നിവര്‍ ശില്‍പിയുടെ പണിപ്പുരയിലെത്തി ശില്‍പ നിര്‍മാണം വിലയിരുത്തി. 17ന് പയ്യാമ്പലം കടല്‍ തീരത്ത് മാരാര്‍ജിയുടെ ശില്‍പത്തോട് കൂടിയ ആദ്യത്തെ സ്മൃതിമണ്ഡപം അനാച്ഛാദനം ചെയ്യും.
