തിരുവനന്തപുരം: മുഖ്യമന്ത്രിയോട് അരുതാത്തത് പലതും പറഞ്ഞതില്‍ ഖേദം ഉണ്ടെന്ന് ജാമ്യം ലഭിച്ചതിനെ തുടര്‍ന്ന് ജയിലില്‍ നിന്ന് പുറത്തിറങ്ങിയ ഡി സി സി മുന്‍ അംഗം ചേന്തി അനില്‍.പെട്ടെന്നുണ്ടായ പ്രകോപനത്തിലാണ് പലതും പറഞ്ഞ് പോയതെന്ന് ചേന്തി അനില്‍ മാധ്യമങ്ങളോട് പറഞ്ഞു. എപ്പോഴെങ്കിലും അവസരം കിട്ടിയാല്‍ അദ്ദേഹത്തിന്റെ മുന്‍പില്‍ വച്ച് ക്ഷമ പറയും
താന്‍ പാര്‍ട്ടിക്കാരനല്ല, ഗുണ്ടയാണെന്ന് ചിലര്‍ പറഞ്ഞപ്പോള്‍ വിഷമം തോന്നി. ഈ പാര്‍ട്ടിക്ക് വേണ്ടിയാണ് കേസുകള്‍ ഉണ്ടാക്കിയത്. തന്റെ പേരിലുള്ള കേസുകള്‍ പരിശോധിച്ചാല്‍ എല്ലാവര്‍ക്കും മനസിലാകും.ഭാര്യമരിച്ചിട്ട് ഒന്‍പത് മാസമായിട്ടേയുളളു. കോര്‍പ്പറേഷന്‍ തെരഞ്ഞെടുപ്പില്‍ സ്ഥാനാര്‍ഥിയായിരുന്ന അവര്‍ 24 വോട്ടിനാണ് പരാജയപ്പെട്ടത്. താന്‍ കുടുംബം പോലും പാര്‍ട്ടിക്കായി നഷ്ടമാക്കി. മോളും താനും മാത്രമാണ് താമസിക്കുന്നത്. ജയിലില്‍ പോയപ്പോള്‍ അഞ്ച് ദിവസം മകള്‍ ഒറ്റക്കായിരുന്നു. ഇതുപോലുള്ള വിഷയങ്ങളില്‍ ചെന്ന് പെടാതെ ഇനി ശ്രദ്ധിക്കുമെന്നും ചേന്തി അനില്‍ പറഞ്ഞു.
മുഖ്യമന്ത്രിയോട് അപമര്യാദയായി പെരുമാറിയ ചേന്തി അനിലിന് ഉപാധികളോടെയാണ് തിരുവനന്തപുരം ജുഡീഷ്യല്‍ മജിസ്ട്രേറ്റ് കോടതിജാമ്യം അനുവദിച്ചത്. മുഖ്യമന്ത്രിയെ വഴിയില്‍ തടഞ്ഞ് അവഹേളിച്ചെന്ന കേസിലാണ് ചേന്തി അനില്‍ അറസ്റ്റിലായത്. ശ്രീനാരായണ ഗുരു ജയന്തി ആഘോഷത്തില്‍ പങ്കെടുക്കാനായി ചേന്തി വഴി പോകവെ ആയിരുന്നു സംഭവം.റൗഡി ലിസ്റ്റിലുള്ള അനില്‍, മുഖ്യമന്ത്രിയെ അവഹേളിക്കണമെന്ന ഉദ്ദേശ്യത്തോടെയാണ് തടഞ്ഞതെന്നും പൊതുജനമധ്യത്തില്‍ ഭീഷണി മുഴക്കിയെന്നും പ്രോസിക്യൂഷന്‍ വാദമുയര്‍ത്തി.
