പട്ടായ: യു.എസ് നാവികസേനയുടെ ഭീമൻ വിമാനവാഹിനി കപ്പലായ യുഎസ്എസ് അബ്രഹാം ലിങ്കൺ തീരമടുക്കുന്നതിന് മുന്നോടിയായി, തായ്ലൻഡിലെ വിനോദസഞ്ചാര കേന്ദ്രമായ പട്ടായയിൽ ലൈംഗികത്തൊഴിലാളികൾക്കും ലൈംഗിക വ്യാപാര ശൃംഖലകൾക്കും നേരെ വ്യാപക നടപടിയുമായി പ്രാദേശിക പോലീസ്. പശ്ചിമേഷ്യയിൽ ഇറാനെതിരെയുള്ള സൈനിക നീക്കങ്ങളിൽ പങ്കാളികളായ ശേഷമാണ് സംഘം കരയിലേക്ക് എത്തുന്നത്.
തുടർച്ചയായി 250 ദിവസത്തിലധികം കടലിൽ ചെലവഴിച്ച ശേഷമാണ് യു.എസ് യുദ്ധക്കപ്പൽ തായ്ലൻഡ് തീരത്തേക്ക് എത്തുന്നത്.സെപ്റ്റംബർ 2 മുതൽ 6 വരെയുള്ള ദിവസങ്ങളിൽ കപ്പലിലെ അയ്യായിരത്തോളം വരുന്ന നാവികരും മരീനുകളും പൈലറ്റുമാരും വിനോദസഞ്ചാര നഗരമായ പട്ടായ സന്ദർശിക്കും. തായ്ലൻഡിൽ നിയമപരമായി വേശ്യാവൃത്തി നിരോധിച്ചിട്ടുണ്ടെങ്കിലും പട്ടായ പോലുള്ള വിനോദസഞ്ചാര കേന്ദ്രങ്ങളിൽ ഇത് പരസ്യമായി നടന്നു വരാറുണ്ട്. എന്നാൽ യു.എസ് സേനയുടെ വരവോടെ നഗരത്തിലുടനീളം നടത്തിയ പരിശോധനകളിൽ നിരവധി ലൈംഗികത്തൊഴിലാളികളെ പോലീസ് കസ്റ്റഡിയിലെടുത്തു. ഓഗസ്റ്റ് 29-ന് ബീച്ച് റോഡിൽ നടത്തിയ റെയ്ഡിൽ തായ്ലൻഡ്, ലാവോസ്, ഉഗാണ്ട എന്നിവിടങ്ങളിൽ നിന്നുള്ള 25 സ്ത്രീകളെ അറസ്റ്റ് ചെയ്തതായി പോലീസ് അറിയിച്ചു.
