തിരുവനന്തപുരം:വെങ്ങാനൂരില് ഓടിക്കൊണ്ടിരുന്ന കാറിന് തീപ്പിടിച്ച് മരിച്ചത് വിരമിച്ച വ്യോമസേനാ കോര്പ്പറല് ഉദ്യോഗസ്ഥന് കോട്ടയം ഏറ്റുമാനൂര് തെള്ളകം കാക്കനാട്ട് വീട്ടില് ടൈറ്റസ് കുര്യന് (65) ആണെന്ന് തിരിച്ചറിഞ്ഞു. തിരുവല്ല ബിലിവേഴ്സ് ചര്ച്ച് മെഡിക്കല് കോളേജിലെ ഡോക്ടറും ടൈറ്റസിന്റെ മകനുമായ ഡെന്നിസ് ടൈറ്റസും ബന്ധുക്കളുമാണ് മൃതദേഹം തിരിച്ചറിഞ്ഞത്.
ഞായറാഴ്ച വൈകിട്ട് വീട്ടില്നിന്ന് പോകുമ്പോള് ടൈറ്റസ് കുര്യന് കരുതിയിരുന്ന വസ്ത്രങ്ങളുടെ കരിഞ്ഞ ഭാഗങ്ങള് കാറിനുള്ളില്നിന്ന് കണ്ടെത്തി. ഇത് ടൈറ്റസിന്റേതാണെന്ന് മകന് സ്ഥിരീകരിച്ചു.
തിങ്കളാഴ്ച പുലര്ച്ചെ 5.15ഓടെ വെങ്ങാനൂര്-പള്ളിച്ചല് റൂട്ടില് അയ്യങ്കാളി സ്മൃതി മണ്ഡപത്തിന് സമീപമാണ് കാര് കത്തിയത്. കാറിന്റെ മുന്ഭാഗത്ത് പെട്ടെന്ന് തീ പടരുകയായിരുന്നു. ഈസമയം ഭാര്യയോടൊപ്പം ബൈക്കില് സഞ്ചരിച്ച ഒരു യുവാവ് കാറിന്റെ മുന്വശത്ത് തീപ്പിടിക്കുന്നത് കണ്ട് ഡ്രൈവറെ വിളിച്ചെങ്കിലും വണ്ടി പിന്നോട്ട് ഉരുണ്ടുനീങ്ങി സമീപത്തെ മതിലിലിടിച്ച് തീ ആളിപ്പടരുകയായിരുന്നു.
ശരീരമാസകലം ഗുരുതര പൊള്ളലേറ്റ നിലയിലായിരുന്നു മൃതദേഹം. ഇടതുകാല് പൊള്ളലേറ്റ് വേര്പെട്ട നിലയിലും തലയോട് പൊട്ടിയ നിലയിലുമായിരുന്നു.
അപകടത്തിന് പിന്നില് മറ്റെന്തെങ്കിലും കാരണമുണ്ടോ എന്നകാര്യവും പൊലീസ് പരിശോധിക്കുന്നുണ്ട്. ഫൊറന്സിക് സംഘം സ്ഥലത്തെത്തി കാറില്നിന്നുള്ള മാംസഭാഗങ്ങളും ഇന്ധനത്തിന്റെ സാന്നിധ്യവും പരിശോധിക്കാനുള്ള സാമ്പിളുകളും ശേഖരിച്ചു. മോട്ടോര് വാഹന വകുപ്പും സംഭവം അന്വേഷിക്കുന്നു.
അസ്വാഭാവിക മരണത്തിന് വിഴിഞ്ഞം പൊലീസ് കേസെടുത്തു. മൃതദേഹത്തിന്റെ ഡി എന് എ പരിശോധനാ ഫലം ലഭിച്ചശേഷം പോസ്റ്റുമോര്ട്ടം നടപടികള് പൂര്ത്തിയാക്കി ബന്ധുക്കള്ക്ക് വിട്ടുനല്കും. മരിച്ച ടൈറ്റസ് കുര്യന്റെ ഭാര്യ ഫിലോമിന.
