ലണ്ടന്‍: ആവേശകരമായ പ്രീമിയര്‍ ലീഗ് പോരാട്ടത്തില്‍ ഫുള്‍ഹാമിനെ രണ്ടിനെതിരെ മൂന്ന് ഗോളുകള്‍ക്ക് പരാജയപ്പെടുത്തി ചെല്‍സി. ചെല്‍സി പരിശീലകനായുള്ള സാബി അലോണ്‍സോയുടെ ആദ്യ മത്സരത്തില്‍ തകര്‍പ്പന്‍ പ്രകടനത്തോടെ കോള്‍ പാമര്‍ ടീമിന്റെ വിജയശില്പിയായി.
ക്രേവന്‍ കോട്ടേജില്‍ നടന്ന മത്സരത്തില്‍ തുടക്കം മുതല്‍ ആക്രമിച്ചു കളിച്ച ചെല്‍സി, ആദ്യ മിനിറ്റില്‍ത്തന്നെ ജാവോ പെഡ്രോയിലൂടെ മുന്നിലെത്തി (1′). എന്നാല്‍ 23-ാം മിനിറ്റില്‍ ജോഷ് കിംഗിലൂടെ ഫുള്‍ഹാം സമനില പിടിച്ചു. ആദ്യ പകുതി അവസാനിക്കുന്നതിന് തൊട്ടുമുമ്പ് (41′) ക്ലബ്ബിനായുള്ള അരങ്ങേറ്റ മത്സരത്തില്‍ തന്നെ മോര്‍ഗന്‍ റോജേഴ്‌സ് ഗോള്‍ നേടിയതോടെ ചെല്‍സി 2-1 ന് വീണ്ടും മുന്നിലെത്തി.
രണ്ടാം പകുതിയുടെ 49-ാം മിനിറ്റില്‍ കോള്‍ പാമര്‍ നേടിയ മ നോഹരമായ ഗോളിലൂടെ ചെല്‍സി തങ്ങളുടെ ലീഡ് 3-1 ആയി ഉയര്‍ത്തി. എന്നാല്‍ 54-ാം മിനിറ്റില്‍ ഫുള്‍ഹാമിനായി അരങ്ങേറ്റം കുറിച്ച ഗോണ്‍സാലോ ഗാര്‍ഷ്യ ഗോള്‍ മടക്കിയതോടെ മത്സരം വീണ്ടും ആവേശത്തിലായി. സമനില ഗോളിനായി ഫുള്‍ഹാം അവസാന നിമിഷങ്ങളില്‍ കനത്ത സമ്മര്‍ദ്ദം ചെലുത്തിയെങ്കിലും ചെല്‍സി പ്രതിരോധം പിടിച്ചുനിന്നു. ഒടുവില്‍ 3-2 ന്റെ ആവേശജയത്തോടെ ചെല്‍സി മൂന്ന് പോയിന്റ് സ്വന്തമാക്കി.
