ലണ്ടന്‍: പുതിയ പരിശീലകന്‍ ലയാം റോസെനിയോറിന് കീഴില്‍ അത്യുഗ്രന്‍ പ്രകടനം കാഴ്‌ച്ചവച്ചവരുന്ന ചെല്‍സി പക്ഷെ ആഴ്‌സണലിന്റെ കരുത്തിന് മുന്നില്‍ മുട്ടുമടക്കി. ഇംഗ്ലീഷ് പ്രീമിയര്‍ ലീഗ് മത്സരത്തില്‍ സ്വന്തം തട്ടകമായ എമിറേറ്റ്‌സ് സ്റ്റേഡിയത്തിലാണ് ചെല്‍സി 1-2ന് ആഴ്‌സണലിനോട് പരാജയപ്പെട്ടത്.
കഴിഞ്ഞ രണ്ട് മാസത്തിനിടെ ഇത് മൂന്നാം തവണയാണ് ചെല്‍സി ആഴ്‌സണലിന് മുന്നില്‍ തോല്‍ക്കുന്നത്. കരബാവോ കപ്പ് സെമിയിലെ രണ്ട് പാദങ്ങളിലും പരാജയപ്പെട്ടു. ഈ കാലയളവില്‍ ചെല്‍സി തോല്‍വി അറിഞ്ഞ ഏക ടീം കൂടിയാണ് ആഴ്‌സണല്‍.
കഴിഞ്ഞ ദിവസം നടന്ന പ്രീമിയര്‍ ലീഗ് പോരാട്ടത്തില്‍ ചെല്‍സി ഒപ്പത്തിനൊപ്പം നല്‍ക്കുന്ന പോരാട്ടം കാഴ്‌ച്ചവച്ചു. സെറ്റ്പീസിലൂടെയാണ് മത്സരത്തിലെ മൂന്ന് ഗോളുകളും വീണത്. 21-ാം മിനിറ്റില്‍ ആഴ്‌സണലിന് അനുകൂലമായ കോര്‍ണര്‍ കിക്കില്‍ നിന്നും വില്ല്യം സാലിബ ഗോള്‍ നേടി. ആഴ്‌സണലിന്റെ ഈ ഒരു ഗോളിന് ആദ്യ പുകിതി തീരുന്നതിന് തൊട്ടുമുമ്പേ ചെല്‍സി സമനില നേടി. ചെല്‍സിക്ക് അനുകൂലമായ കോര്‍ണര്‍ കിക്ക് ആഴ്‌സണലിന്റെ സെല്‍ഫ് ഗോളായാണ് കലാശിച്ചത്. രണ്ടാം പകുതിയിലേക്ക് കടന്നപ്പോഴും മത്സരത്തില്‍ ആഴ്‌സണല്‍ ഒരുപടി മുന്നില്‍ നിന്നു. 66-ാം മിനിറ്റില്‍ ഗോളും നേടി. മറ്റൊരു കോര്‍ണര്‍ കിക്കില്‍ നിന്നും ജൂറിയന്‍ ടിംബര്‍ ആണ് ഗോള്‍ നേടിയത്. 70-ാം മിനിറ്റില്‍ ചെല്‍സിയുടെ പെഡ്രോ നെറ്റോ ആഴ്‌സണല്‍ താരത്തെ ഗുരുതരമായി ഫൗള്‍ ചെയ്തതിനെ തുടര്‍ന്ന് ചുവപ്പ് കാര്‍ഡ് കണ്ട് പുറത്തായി. പിന്നീട് പത്ത് പേരായി ചുരുങ്ങിയ ചെല്‍സിക്ക് മുന്നില്‍ സാധ്യതകള്‍ അസ്തമിച്ചു.
ജയത്തോടെ 29 മത്സരങ്ങളില്‍ നിന്ന് ആഴ്‌സണലിന് 64 പോയിന്റായി. തൊട്ടുതാഴെ മാഞ്ചസ്റ്റര്‍ സിറ്റിയാണ്. 28 മത്സരങ്ങളില്‍ നിന്ന് 59 പോയിന്റുണ്ട്. അടുത്തിടെയായി ദീര്‍ഘകാലത്തെ പോരായ്‌മകളില്‍ നിന്നും കുതിച്ച് മുന്നേറുന്ന യുണൈറ്റഡ് 51 പോയിന്റുമായി മൂന്നാം സ്ഥാനത്തെത്തി.
