ലണ്ടന്: ഇംഗ്ലീഷ് ഫുട്ബോളിലെ പ്രധാന പോരാട്ടം എഫ് എ കപ്പിന് ഇന്ന് തിരശീല വിഴും. രാത്രി 7.30ന് ലണ്ടനിലെ വെംബ്ലി സ്റ്റേഡിയത്തില് നടക്കുന്ന പോരാട്ടത്തില് ഏറ്റുമുട്ടുന്നത് മാഞ്ചസ്റ്റര് സിറ്റിയും ചെല്സിയും. സീസണില് വലിയ മങ്ങലേറ്റ് നില്ക്കുന്ന രണ്ട് ടീമുകള്ക്കും ഇന്നത്തെ കിരീടം ആശ്വാസമാകുന്ന അനിവാര്യമാണ്.
കോച്ചുമാരെ മാറിമാറി പരീക്ഷിച്ച് വശം കെട്ട ചെല്സി പുതുവര്ഷം പിറന്നതോടെ ടീമിന്റെ ചുമതല ഏറ്റെടുത്ത ലയാം റോസെനിയോറിന് കീഴില് കുതിപ്പ് നടത്തി. പക്ഷെ പെട്ടെന്ന് തന്നെ ടീമിന്റെ പ്രഭ കെട്ടു. പ്രീമിയര് ലീഗില് അഞ്ച് തുടര് തോല്വികള് വഴങ്ങിയതോടെ റോസെനിയോറും പടിക്ക് പുറത്തായി. കലം മക്ഫാര്ലേന് എന്ന ഇടക്കാല പരിശീലകന് കീഴിലാണ് ഇന്നത്തെ ഫൈനല് കളിക്കാനിരിക്കുന്നത്. ഈ ഇടക്കാല കോച്ചിന് കീഴിലാണ് ലീഡ്സിനെ സെമിയില് 1-0ന് തോല്പ്പിച്ച് ചെല്സി ഫൈനലില് കടന്നത്.
പെപ്പ് ഗ്വാര്ഡിയോളയുടെ സിറ്റി സീസണില് വലിയ തിരിച്ചടിയാണ് നേരിട്ടുകൊണ്ടിരിക്കുന്നത്. പ്രീമിയര് ലീഗില് സാങ്കേതികമായി ഫോട്ടോ ഫിനിഷിന് ഒരുങ്ങുകയാണെന്ന് പ്രതീക്ഷ നിലനിര്ത്താം. പക്ഷെ പോയിന്റ് നിലയില് നേരീയ വ്യത്യാസത്തിനാണെങ്കിലും ആഴ്സണല് മുന്നില് തുടരുന്നുണ്ട്. അതിനാല് ഇക്കുറി സിറ്റിക്ക് ഉറപ്പാക്കാന് സാധിക്കുന്ന സീസണിലെ ഏക കിരീടനേട്ടം ഇന്നത്തെ എഫ് എ കപ്പ് മാത്രമാണ്. സൗതാംപ്ടണിനെ സെമിയില് തോല്പ്പിച്ചാണ് സിറ്റി ഫൈനലിലെത്തിയിരിക്കുന്നത്.
