ലണ്ടന്‍: ഇംഗ്ലീഷ് പ്രീമിയര്‍ ലീഗ് ഫുട്‌ബോളിലെ വാശിപ്പോരാട്ടത്തില്‍ യുണൈറ്റഡ് വിജയിച്ചു. സ്വന്തം സ്‌റ്റേഡിയം സ്റ്റാംഫഡ് ബ്രിഡ്ജില്‍ അത്യുഗ്രന്‍ പോരാട്ടം കാഴ്‌ച്ചവച്ച ചെല്‍സി ഗോളടിക്കാനറിയാതെ കീഴടങ്ങുകയായിരുന്നു. മത്സരത്തില്‍ 1-0ന്റെ വിജയമാണ് യുണൈറ്റഡ് നേടിയത്.
കഴിഞ്ഞ ജനുവരി മുതല്‍ ഇരു ടീമുകളും പുതിയ പരീശലകര്‍ക്ക് കീഴില്‍ പഴയ പ്രതാപം തിരിച്ചുപിടിക്കാനുള്ള വലിയ പരിശ്രമത്തിനിടെയാണ് ഫുട്‌ബോള്‍ പ്രേമികള്‍ക്ക് വിരുന്നായി ഇരുവരും കൊമ്പുകോര്‍ക്കുന്ന മത്സരം വന്നെത്തിയത്. സീസണ്‍ ഡിസംബറിലെത്തുമ്പോള്‍ പ്രീമിയര്‍ ലീഗ് പട്ടികയുടെ ആദ്യ പത്തില്‍ പോലും ഇല്ലാതിരുന്ന യുണൈറ്റഡ് ഇന്നലത്തെ വിജയത്തിലൂടെ മൂന്നാം സ്ഥാനത്തേക്കെത്തി. മുന്‍ താരം കൂടിയായ മൈക്കല്‍ കാരിക്ക് ആണ് ടീമിനെ ജനുവരി മുതല്‍ പരിശീലിപ്പിക്കുന്നത്.
ചെല്‍സി ലയാം റോസെനിയോറിന് കീഴില്‍ സീസണില്‍ മികച്ച പ്രകടനം നടത്തിക്കൊണ്ടിരിക്കുകയാണ്. കഴിഞ്ഞ മത്സരങ്ങളിലേറ്റ തുടര്‍ തോല്‍വികള്‍ തിരിച്ചടിയായെങ്കിലും ഇന്നലെ മികവോടെ പൊരുതി. പന്തടക്കത്തിലും മുന്നേറ്റത്തിലും വമ്പ് കാട്ടിയ ടീമിന്റെ ഗോള്‍ ഷോട്ടുകള്‍ പലതും കൃത്യതയില്ലാതെ പിഴയ്‌ക്കുകയായിരുന്നു.
മറുഭാഗത്ത് യുണൈറ്റഡ് ചെല്‍സിയുടെ ആക്രമണ ഫുട്‌ബോളിനോട് കിടപിടിക്കുന്ന പോരാട്ടം തന്നെ പുരത്തെടുത്തു. പക്ഷെ കിട്ടിയ അവസരത്തില്‍ കൃത്യമായി ഫിനിഷ് ചെയ്യാന്‍ സാധിച്ചു. ആദ്യപകുതി പിന്നിടാനിരിക്കെ 44-ാം മിനിറ്റില്‍ വലത് ഭാഗത്ത് കൂടി പന്തുമായി മുന്നേറിയ സൂപ്പര്‍ താരം ബ്രൂണോ ഫെര്‍ണാണ്ടസ് നല്‍കിയ ക്രോസിനെ സ്‌ട്രൈക്കര്‍ മത്തേവൂസ് കുന്‍ഹ ഗോളാക്കി മാറ്റുകയായിരുന്നു.
