തിരുവനന്തപുരം: പിന്‍വാതില്‍ നിയമനത്തിനെതിരെ സംസ്ഥാന വ്യാപകമായ സമരം നടത്തിയ യുഡിഎഫിന് ആര്‍ജവമുണ്ടെങ്കില്‍ പിഎസ്‌സി ചെയര്‍മാന്‍ അടക്കമുള്ള ബോര്‍ഡംഗങ്ങളെ വി.ഡി. സതീശന്‍ സര്‍ക്കാര്‍ പിരിച്ചുവിടണമെന്ന് ബി.ബി. ഗോപകുമാര്‍ എംഎല്‍എ. യുവമോര്‍ച്ച പിഎസ്‌സി ആസ്ഥാനത്തിന് മുന്നില്‍ നടത്തിവന്ന രാപകല്‍ സമരത്തിന്റെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
കഴിഞ്ഞ പത്തുവര്‍ഷക്കാലത്തെ പിഎസ്‌സിയിലെ ക്രമക്കേടുകളെക്കുറിച്ച് കേരളത്തിലെ പൊതുസമൂഹത്തിന് ബോധ്യം വരത്തക്ക രീതിയില്‍ നിഷ്പക്ഷമായ ഒരു അന്വേഷണം നടത്തണം. കേരളം ഭരിച്ച രണ്ടുമുന്നണികളുടെയും കാലത്ത് വ്യാപകമായ ക്രമക്കേടുകള്‍ക്കാണ് പിഎസ്‌സി സാക്ഷ്യം വഹിച്ചിട്ടുള്ളത്. കോടതി ഉത്തരവിന്റെ അടിസ്ഥാനത്തില്‍ പിഎസ്‌സി റാങ്ക് ലിസ്റ്റുമായി ബന്ധപ്പെട്ട അഴിമതി അന്വേഷണത്തില്‍ വി.ഡി. സതീശന്‍ സര്‍ക്കാര്‍ ഇപ്പോഴും റിപ്പോര്‍ട്ട് നല്‍കിയിട്ടില്ല. ഇങ്ങനെ ഒരു അട്ടിമറി പിഎസ്‌സി അന്വേഷണത്തില്‍ നടത്തിയിട്ടുണ്ട്. ഞങ്ങള്‍ അന്വേഷിക്കുകയാണ് എന്നാണ് പറയുന്നത്. എല്‍ഡിഎഫിനെ സംരക്ഷിക്കുന്ന ഈ സര്‍ക്കാരിന്റെ ഭാഗത്തുനിന്ന് നിഷ്പക്ഷ അന്വേഷണം ഉണ്ടാകില്ല. അതിനാലാണ് കേന്ദ്ര അന്വേഷണ ഏജന്‍സിയായ സിബിഐയെ കൊണ്ട് അന്വേഷിപ്പിക്കണമെന്ന് യുവമോര്‍ച്ച ആവശ്യപ്പെടുന്നത്.
കേരളം കണ്ട ഏറ്റവും വലിയ തട്ടിപ്പായ ശബരിമല സ്വര്‍ണത്തട്ടിപ്പ് കേരളീയര്‍ക്ക് മനസ്സിലായത് കേരള ഹൈക്കോടതി നടത്തിയ അന്വേഷണത്തിന്റെ ഫലമായിട്ടാണ്. ചരിത്രപരമായ ആ പോരാട്ടത്തിന് മുന്നില്‍ നിന്നത് ബിജെപി മാത്രമാണെന്നതാണ് യാഥാര്‍ത്ഥ്യം. ദേവസ്വം ബോര്‍ഡിലെ പോലെ മറ്റൊരു തട്ടിപ്പാണ് പിഎസ്‌സിയിലും നടക്കുന്നത്. പ്രശാന്ത് അടക്കമുള്ള മുന്‍ ദേവസ്വം ബോര്‍ഡ് പ്രസിഡന്റുമാര്‍ ഇന്ന് ജയിലറകളിലാണെന്ന കാര്യം പിഎസ്‌സി ചെയര്‍മാനെ ഓര്‍മപ്പെടുത്തുകയാണെന്നും ഗോപകുമാര്‍ പറഞ്ഞു.
കേരളത്തിലെ പിഎസ്‌സി ഉദ്യോഗാര്‍ത്ഥികള്‍ക്ക് വേണ്ടി ശബ്ദിക്കുന്ന ഏക യുവജന പ്രസ്ഥാനം യുവമോര്‍ച്ചയാണ്. പിഎസ്‌സി റാങ്ക് ലിസ്റ്റിലെ ഉദ്യോഗാര്‍ത്ഥികള്‍ക്ക് നീതി ലഭിക്കുന്നതുവരെ യുവമോര്‍ച്ചയുടെ ഈ പോരാട്ടം തുടരും. അതിന് നേതൃത്വം നല്‍കുന്ന യുവമോര്‍ച്ചയോടൊപ്പം ബിജെപിയും ഉണ്ടാകുമെന്ന് ബി.ബി. ഗോപകുമാര്‍ എംഎല്‍എ പറഞ്ഞു.
