തൃശൂർ: തൃശൂർ പൂരം കലക്കൽ കേസിൽ പുനരന്വേഷണം ആവശ്യപ്പെട്ട് തിരുവമ്പാടി ദേവസ്വം രംഗത്ത്. നിലവിലെ അന്വേഷണ റിപ്പോർട്ട് യഥാർഥ വസ്തുതകൾ മറച്ചുവെച്ച് വാദിയെ പ്രതിയാക്കുന്ന രീതിയിലാണെന്ന് തിരുവമ്പാടി ദേവസ്വം സെക്രട്ടറി കെ. ഗിരീഷ് കുമാർ ആരോപിച്ചു. പൂരം കലക്കലിന് പിന്നിൽ ആരാണെന്ന് എല്ലാവർക്കും അറിയാമെന്നും അദ്ദേഹം പറഞ്ഞു.
സംഭവത്തിൽ നിഷ്പക്ഷമായ അന്വേഷണം ഉറപ്പാക്കണമെന്ന് ആവശ്യപ്പെട്ട് മുഖ്യമന്ത്രിയെയും ആഭ്യന്തരമന്ത്രിയെയും ദേവസ്വംമന്ത്രിയെയും നേരിൽ കാണുമെന്ന് ഗിരീഷ് കുമാർ വ്യക്തമാക്കി. പൂരം നടന്ന ദിവസം പൊലീസിന്റെ ഇടപെടലുമായി ബന്ധപ്പെട്ട ദൃശ്യങ്ങളും മറ്റ് തെളിവുകളും ലഭ്യമാണെന്നും അദ്ദേഹം ചൂണ്ടിക്കാട്ടി. പൂരം കലക്കൽ സംഭവത്തിലെ യഥാർഥ ഇര ഇപ്പോഴത്തെ ദേവസ്വം മന്ത്രിയാണെന്നും അദ്ദേഹം ആരോപിച്ചു.
അതേസമയം, പൂരം കലക്കൽ ആരോപണവുമായി ബന്ധപ്പെട്ട അന്വേഷണ റിപ്പോർട്ട് പൊലീസ് മേധാവി റാവഡ എ. ചന്ദ്രശേഖർ സർക്കാരിന് കൈമാറി. തിരുവമ്പാടി ദേവസ്വത്തിലെ എട്ട് ഭാരവാഹികൾക്കെതിരെ കുറ്റപത്രം സമർപ്പിക്കുന്നതിന് അനുമതി തേടിയുള്ള റിപ്പോർട്ടാണ് ആഭ്യന്തരവകുപ്പിന് നൽകിയതെന്നാണ് വിവരം. എന്നാൽ, പൂരം കലക്കൽ ആരോപണത്തിൽ നേരത്തേ ആരോപണവിധേയനായ എഡിജിപി എം.ആർ. അജിത് കുമാറിന്റെ പങ്കിനെക്കുറിച്ച് റിപ്പോർട്ടിൽ പരാമർശമില്ലെന്നാണ് വിമർശനം.
2024 ഒക്ടോബറിലാണ് പൂരം കലക്കൽ ആരോപണത്തിൽ പിണറായി വിജയൻ സർക്കാർ അന്വേഷണം പ്രഖ്യാപിച്ചത്. പൂരം കലക്കാൻ ആർഎസ്എസുമായി ചേർന്ന് എം.ആർ. അജിത് കുമാർ ഗൂഢാലോചന നടത്തിയെന്ന ആരോപണവുമായി പ്രതിപക്ഷവും സിപിഐ ഉൾപ്പെടെയുള്ളവരും രംഗത്തെത്തിയിരുന്നു. എന്നാൽ, തിരുവമ്പാടി ദേവസ്വത്തിന്റെ ഭാഗത്തുനിന്നുണ്ടായ വീഴ്ചകൾക്ക് പ്രാധാന്യം നൽകുന്ന അന്വേഷണ റിപ്പോർട്ട് പുറത്തുവന്നതോടെ വിവാദം വീണ്ടും ശക്തമായിരിക്കുകയാണ്. റിപ്പോർട്ടിന്റെ കണ്ടെത്തലുകളും അന്വേഷണം മുന്നോട്ടുകൊണ്ടുപോകുന്ന രീതിയും സംബന്ധിച്ച് ദേവസ്വം പുനരന്വേഷണം ആവശ്യപ്പെട്ടതോടെ കേസിൽ പുതിയ രാഷ്‌ട്രീയ ചർച്ചകൾക്കും വഴിതുറന്നിരിക്കുകയാണ്.
