ഗുരുവായൂര്: ഗുരുവായൂരില് ഭക്തര്ക്ക് വെര്ച്വല് ക്യൂ വഴിയുള്ള ദര്ശനം ഇന്നലെ രാവിലെ ആരംഭിച്ചു. രാവിലെ ഏഴു മുതല് എട്ടു വരെയുള്ള ആദ്യഘട്ടത്തില് നിരവധി ഭക്തര് ഇതുവഴി ശ്രീഗുരുവായൂരപ്പ ദര്ശന സായൂജ്യം നേടി. രാവിലെ ആറരയോടെ ക്ഷേത്രം കിഴക്കേ നടയില് ഭഗവതിയമ്പലത്തിലേക്കുള്ള പ്രവേശന കവാടത്തിന് സമീപം നടന്ന ചടങ്ങില് ദേവസ്വം ചെയര്മാന് എ.വി. ഗോപിനാഥ് നാട മുറിച്ച് വെര്ച്വല് ക്യൂ ദര്ശനത്തിന്റെ ഉദ്ഘാടനം നിര്വ്വഹിച്ചു. തിരിച്ചറിയല് രേഖ പരിശോധനക്ക് ശേഷം കെ. രഘുനാഥന് പിള്ള എന്ന ഭക്തനാണ് ആദ്യ വെര്ച്വല് ക്യൂ ദര്ശനം നേടിയത്. ഇടവിട്ട് പെയ്ത മഴയും, പ്രതികൂല കാലാവസ്ഥയും മറികടന്നെത്തിയ നൂറിലേറെ ഭക്തര്ക്ക് ആദ്യ മണിക്കൂറില് ദര്ശനം സാധ്യമായി. ഉച്ചയ്ക്ക് 1 മണി വരെ 1800 ഭക്തര് വെര്ച്വല് ദര്ശനത്തിന് ബുക്ക് ചെയ്തിരുന്നു.
തിരിച്ചറിയല് രേഖ ഹാജരാക്കണം
പരീക്ഷണാടിസ്ഥാനത്തില് തുടങ്ങിയ വെര്ച്വല് ക്യൂ ദര്ശനത്തിനെത്തുന്ന ഭക്തര് ഓണ്ലൈനില് ബുക്ക് ചെയ്തതിന്റെ രസീതിയുമായി അര മണിക്കൂര് മുന്പ് റിപ്പോര്ട്ട് ചെയ്യണം. കിഴക്കേനടയിലെ ക്യൂ കോംപ്ലക്സിന്റെ വടക്കേ അറ്റത്തെ വരിയാണ് വെര്ച്വല് ക്യൂ ദര്ശനക്കാര്ക്കായി ഏര്പ്പെടുത്തിയിട്ടുള്ളത്. ബുക്ക് ചെയ്യാനുപയോഗിച്ച തിരിച്ചറിയല് രേഖ തന്നെ കയ്യില് കരുതണം. ഇത് സുരക്ഷാ ജീവനക്കാര്ക്ക് പരിശോധനക്കായി നല്കാന് ഭക്തര് ശ്രദ്ധിക്കേണ്ടതാണെന്ന് ദേവസ്വം അറിയിച്ചു. ചൊവ്വ, വ്യാഴം ദിവസങ്ങളില് രാവിലെ ഏഴു മുതല് ഉച്ചവരെ ഓരോ മണിക്കൂര് വീതവും, വൈകീട്ട് നാലു മുതല് അഞ്ചുവരെയുമാണ് വെര്ച്വല് ക്യൂ വഴിയുള്ള ദര്ശനം. ഓരോ മണിക്കൂറിലും 300 പേരെ വീതം പ്രവേശിപ്പിക്കും.
