പത്തനംതിട്ട: ശബരിമലയിലെ നെയ്യ് ഇടപാട് വിവാദം ദേവസ്വം വിജിലന്‍സ് അന്വേഷിക്കും.ദേവസ്വം മന്ത്രി കെ മുരളീധരന്‍ ഇതിന് ഉത്തരവിട്ടു.
ദേവസ്വം സെക്രട്ടറി നടത്തിയ പ്രാഥമിക അന്വേഷണത്തില്‍ ഗുരുതരമായ കണ്ടെത്തലുകളാണ് ഉണ്ടായിരുന്നത്.തുടര്‍ന്ന് സമഗ്രമായ അന്വേഷണം ആവശ്യപ്പെട്ടുളള റിപ്പോര്‍ട്ടാണ് സമര്‍പ്പിച്ചത്.ഇതിന്റെ അടിസ്ഥാനത്തിലാണ് സംഭവത്തില്‍ ക്രിമിനല്‍ ഗൂഢാലോചന നടന്നിട്ടുണ്ടോ എന്നതടക്കം കാര്യങ്ങള്‍ പരിശോധിക്കാന്‍ ദേവസ്വം വിജിലന്‍സിന് നിര്‍ദേശം നല്‍കിയത്. തിരുവിതാംകൂര്‍ ദേവസ്വം ബോര്‍ഡിന്റെ ചീഫ് വിജിലന്‍സ് ആന്‍ഡ് സെക്യൂരിറ്റി ഓഫീസര്‍ക്ക് അന്വേഷണ ചുമതല നല്‍കിയിട്ടുണ്ടെന്നും ഒരാഴ്ചയ്‌ക്കുള്ളില്‍ അന്വേഷണം പൂര്‍ത്തിയാക്കി റിപ്പോര്‍ട്ട് സമര്‍പ്പിക്കണമെന്ന് ആവശ്യപ്പെട്ടിട്ടുണ്ടെന്നും മന്ത്രി അറിയിച്ചു.
അതേസമയം ,ശബരിമലയിലെ നെയ് വിതരണത്തില്‍ മില്‍മയ്‌ക്ക് വീഴ്ച പറ്റിയിട്ടില്ലെന്നാണ് ചെയര്‍മാന്‍ കെ എസ് മണി നേരത്തെ അവകാശപ്പെട്ടത്.നെയ്യ് വിതരണവുമായി ബന്ധപ്പെട്ട് മില്‍മയ്‌ക്കെതിരെ പ്രചരിക്കുന്ന വാര്‍ത്തകള്‍ അടിസ്ഥാനരഹിതമാണ്.മില്‍മയുടെ ഉല്‍പ്പന്നങ്ങളില്‍ യാതൊരു കൃത്രിമവും നടന്നിട്ടില്ല.മില്‍മയുടെ നെയ്യ് വേണ്ടെന്ന് ദേവസ്വം ബോര്‍ഡ് പറഞ്ഞിട്ടില്ലെന്നും, പുറമെ നിന്ന് നെയ്യ് വാങ്ങേണ്ടതില്ലെന്നാണ് അറിയിച്ചതെന്നും അദ്ദേഹം പറഞ്ഞു. സ്റ്റേറ്റ് ലാബില്‍ പരിശോധിച്ച ശേഷം ഉയര്‍ന്ന ഗുണനിലവാരം ഉറപ്പാക്കിയാണ് ശബരിമലയിലേക്ക് നെയ്യ് അയച്ചത്. ഗുണനിലവാരത്തില്‍ വീഴ്ചയുണ്ടായതായി ദേവസ്വം ബോര്‍ഡ് ഔദ്യോഗികമായി അറിയിച്ചിട്ടില്ലെന്നും കെ എസ് മണി കൂട്ടിച്ചേര്‍ത്തു. ക്രമക്കേടുകള്‍ നടന്നിട്ടുണ്ടെങ്കില്‍ അതില്‍ മില്‍മയ്‌ക്ക് യാതൊരു പങ്കുമില്ല.അമിതലാഭത്തിന് വേണ്ടി മില്‍മ കൃത്രിമം കാണിക്കാറില്ലെന്നും കെ.എസ്. മണി വ്യക്തമാക്കി. ഇതര സംസ്ഥാനങ്ങളില്‍ നിന്നുള്ള ഇടപാടുകാരാണോ ഇതിനു പിന്നിലെന്ന് സംശയമുണ്ട്. മില്‍മയുടെ ലോഗോയോ എംബ്ലമോ ദുരുപയോഗം ചെയ്തിട്ടുണ്ടെന്ന് തെളിഞ്ഞാല്‍ കര്‍ശന നിയമനടപടി സ്വീകരിക്കുമെന്നും അദ്ദേഹം അറിയിച്ചു.മില്‍മയിലെ ഏതെങ്കിലും ഉദ്യോഗസ്ഥര്‍ക്ക് പങ്കുണ്ടെന്ന് അന്വേഷണത്തില്‍ തെളിഞ്ഞാല്‍ ശക്തമായ നടപടി ഉണ്ടാകുമെന്നും അദ്ദേഹം മുന്നറിയിപ്പ് നല്‍കി.
