ന്യൂദല്ഹി : ജന്തര് മന്തറില് നടന്ന ‘കോക്രോച്ച് ജനതാ പാര്ട്ടി’ (സി ജെ പി) പ്രതിഷേധത്തില് പങ്കെടുത്തവര്ക്കെതിരെ പ്രതികൂല നിയമനടപടികളൊന്നും സ്വീകരിക്കില്ലെന്ന് ദല്ഹി സര്ക്കാര് വ്യാഴാഴ്ച അറിയിച്ചു. എന്നാല്, സുപ്രീം കോടതി ഉത്തരവ് പ്രകാരം, ക്രിമിനല് പശ്ചാത്തലമുള്ളവര്ക്ക് സംരക്ഷണം ലഭിക്കില്ലെന്നും സര്ക്കാര് വ്യക്തമാക്കി.
സമരത്തിനിടെ ആരെങ്കിലും കസ്റ്റഡിയിലാവുകയോ അറസ്റ്റിലാവുകയോ ചെയ്തിട്ടുണ്ടെങ്കില് അവരെ വിട്ടയക്കും.എന്നാല് അതിനുമുമ്പ് പരിശോധന നടത്തുമെന്നും സര്ക്കാര് അറിയിച്ചു.അറസ്റ്റിലായവരെ വേഗത്തില് വിട്ടയക്കാനുള്ള നടപടികള് സ്വീകരിക്കും.
പ്രതിഷേധത്തില് പങ്കെടുത്ത വ്യക്തികള്ക്കെതിരെ തുടര്നടപടികളൊന്നും സ്വീകരിക്കാന് ദല്ഹി സര്ക്കാര് ഉദ്ദേശിക്കുന്നില്ല. ഇക്കാര്യത്തില് ഭാവിയില് മറ്റ് നടപടികളൊന്നും സ്വീകരിക്കില്ല- ദല്ഹി ലെഫ്റ്റനന്റ് ഗവര്ണറുടെ അംഗീകാരത്തോടെ പുറപ്പെടുവിച്ച ഉത്തരവില് പറയുന്നു.
നീറ്റ് യു ജി പരീക്ഷയിലെ ക്രമക്കേടിന്റെ പശ്ചാത്തലത്തില് കേന്ദ്ര വിദ്യാഭ്യാസ മന്ത്രി സ്ഥാനം ധര്മേന്ദ്ര പ്രധാന് രാജിവച്ചതിനെത്തുടര്ന്ന് സി ജെ പി സമരം അവസാനിപ്പിക്കാന് തീരുമാനിച്ചിരുന്നു.പ്രതിഷേധത്തില് പങ്കെടുത്തവര്ക്കെതിരെ നിയമ നടപടികള് പാടില്ലെന്ന വ്യവസ്ഥ സമരം അവസാനിപ്പിക്കാന് കേന്ദ്ര സര്ക്കാരുമായി നടത്തിയ ചര്ച്ചയില് സി ജെ പി മുന്നോട്ട് വച്ചിരുന്നു.
