ന്യൂദല്‍ഹി: വിദേശശത്രുക്കള്‍ ഇന്ത്യയെ അസ്ഥിരപ്പെടുത്താനായി പ്രവര്‍ത്തിക്കുന്നുവെന്നും നിരപരാധികളായ വിദ്യാര്‍ത്ഥികളെ അതിനു കരുവാക്കുന്നുവെന്നുമുള്ള ഗുരുതര വിലയിരുത്തലുമായി ബാര്‍ കൗണ്‍സില്‍ ഓഫ് ഇന്ത്യ . ‘രാജ്യത്തെ ബുദ്ധിജീവികളോടുള്ള ഒരു അഭ്യര്‍ത്ഥന’ എന്ന തലക്കെട്ടോടെ, ബാര്‍ കൗണ്‍സില്‍ ചെയര്‍മാന്‍ മനന്‍ കുമാര്‍ മിശ്ര പുറത്തിറക്കിയ പ്രസ്താവനയില്‍, നിയമ സമൂഹത്തോടും ബുദ്ധിജീവികളോടും വിവേകമുള്ള പൗരന്മാരോടും ഇക്കാര്യത്തില്‍ ഇടപെടാനും രാജ്യത്തെ സംരക്ഷിക്കാനും അഭ്യര്‍ത്ഥിക്കുന്നു.
വിദേശ വിശ്വസ്തതയുള്ള ചില രാഷ്‌ട്രീയക്കാര്‍ തന്ത്രപൂര്‍വ്വം യുവതലമുറയെ നിയമലംഘനത്തിനു പ്രേരിപ്പിക്കുന്നുവെന്ന വലിയ നിരീക്ഷണവും പത്രക്കുറിപ്പിലുണ്ട്.
‘സാമൂഹിക വിരുദ്ധരും ദേശവിരുദ്ധരുമായ ശക്തികള്‍ അവരുടെ പ്രക്ഷോഭം കൈയടക്കി; നമ്മുടെ രാജ്യത്തെ തകര്‍ക്കുകയും നശിപ്പിക്കുകയും ചെയ്യുക എന്നതാണ് ഇവരുടെ പ്രകടമായ ലക്ഷ്യം, സമീപകാലത്ത് മറ്റെവിടെയും സംഭവിച്ചതുപോലെ. ഇന്ത്യയുടെ സാമ്പത്തിക പുരോഗതിയുമായും, ആഗോളതലത്തില്‍ വളര്‍ന്നുവരുന്ന ഔന്നത്യവുമായും, വികസനവുമായും പൊരുത്തപ്പെടാന്‍ ഈ വിഘടന ശക്തികള്‍ക്ക് കഴിയുന്നില്ല, പ്രസ്താവനയില്‍ പറയുന്നു.
‘നമ്മുടെ ഭാരതത്തിന്റെ സമാധാനത്തിനും സമൃദ്ധിക്കും വേണ്ടി വിദേശ വിശ്വസ്തതയുള്ള വ്യക്തികള്‍ക്ക് യഥാര്‍ത്ഥമായ ഒരു താല്‍പ്പര്യവുമില്ലെന്ന് വിവേകമുള്ള ഓരോ വ്യക്തിയും തിരിച്ചറിയുന്നു; പകരം അവര്‍ ശത്രുരാജ്യങ്ങളുടെ താളത്തില്‍ നൃത്തം ചെയ്യുകയാണ്. അത്തരം ആളുകള്‍ അധികാരം പിടിച്ചെടുക്കാനോ രാജ്യത്തിന്റെ നാശം വരുത്താനോ ഒന്നും ചെയ്യില്ല. വിദ്യാര്‍ത്ഥികളുടെയോ രാജ്യത്തിന്റെയോ ക്ഷേമത്തില്‍ അവര്‍ക്ക് താല്‍പ്പര്യമില്ല. നിയമലംഘനം സൃഷ്ടിക്കുക, ഇന്ത്യയെ അസ്ഥിരപ്പെടുത്തുക, അധികാരം പിടിച്ചെടുക്കുക എന്നതാണ് അവരുടെ ഏക ലക്ഷ്യം, അവര്‍ വളരെക്കാലമായി ഈ ലക്ഷ്യം പിന്തുടര്‍ന്നുവരുന്നു. ബംഗ്ലാദേശിനെയും നേപ്പാളിനെയും പോലെ നമ്മുടെ രാജ്യവും നശിപ്പിക്കപ്പെടണമെന്ന് അവര്‍ ആഗ്രഹിക്കുന്നു.
‘പേര്‍ വെളിപ്പെടുത്താത്ത ഒരു രാഷ്‌ട്രീയക്കാരന്‍’ ഇടയ്‌ക്കിടെ വിദേശയാത്ര നടത്തുകയും, ഭീകരതയെ പിന്തുണയ്‌ക്കുന്നവര്‍ ഉള്‍പ്പെടെയുള്ള ഇന്ത്യാ വിരുദ്ധരെ കാണുകയും നമ്മുടെ രാജ്യത്തെ അസ്ഥിരപ്പെടുത്താന്‍ ഉദ്ദേശിച്ചുള്ള വലിയ ഫണ്ട് സ്വീകരിക്കുകയും ചെയ്യുന്നുണ്ടെന്ന് മിശ്ര പത്രക്കുറിപ്പില്‍ ആരോപിച്ചു.
