തിരുവനന്തപുരം: ശബരിമല വിഷയത്തില്‍ തന്നെ കുടുക്കിയതാണെന്നും രാഷ്‌ട്രീയപ്രേരിതമായ കേസാണെന്നും ദേവസ്വം ബോര്‍ഡ് മുന്‍ പ്രസിഡന്റ് പി എസ് പ്രശാന്ത്. നിരപരാധിത്വം തെളിയിച്ച് തിരിച്ചു വരുമെന്ന് വൈദ്യപരിശോധനയ്‌ക്ക് എത്തിച്ചപ്പോള്‍ മാധ്യമങ്ങളോട് പ്രതികരിച്ചു. ദേവസ്വം ബോര്‍ഡ് അംഗമായിരുന്ന സിപിഐ നേതാവ് അജികുമാറിനെയും പ്രത്യേക അന്വേഷണ സംഘം അറസ്റ്റ് ചെയ്തു. 2025 ല്‍ ഹൈക്കോടതി അനുമതിയില്ലാതെ ദ്വാരപാലക പാളികള്‍ സ്വര്‍ണം പൂശാന്‍ പുറത്തേക്ക് കൊണ്ടുപോകാന്‍ ശ്രമിച്ചതില്‍ പങ്കുണ്ടെന്ന് കണ്ടെത്തിയതാണ് അറസ്റ്റിന് കാരണം.
രാഷ്‌ട്രീയ സമ്മര്‍ദത്താല്‍ ഉടന്‍ അറസ്റ്റിലാകുമെന്ന് രാവിലെ പ്രശാന്ത് ഫേസ് ബുക്ക് പോസ്റ്റിട്ടിരുന്നു. 2019 ലെ ശബരിമല സ്വര്‍ണ മോഷണ കേസ് പുറത്ത് വരാന്‍ നിമിത്തമായി മാറുകയും സത്യസന്ധമായി പ്രവര്‍ത്തിക്കുകയും ചെയ്ത തങ്ങളുടെ ബോര്‍ഡിനെയും പ്രതിയാക്കിയെന്നാണ് പ്രശാന്ത് ആരോപിക്കുന്നത്. ഈ കേസ് അന്വേഷണത്തോട് പൂര്‍ണമായും സഹകരിക്കും. എന്നാല്‍ ഇതിന് പിന്നിലെ രാഷ്‌ട്രീയ നീക്കങ്ങളെ തുറന്ന് കാട്ടുമെന്നും പ്രശാന്ത് ഫേസ് ബുക്ക് കുറിപ്പില്‍ നേരത്തെ പറഞ്ഞു.
ഇടത് സര്‍ക്കാരിന്റെ കാലത്തെ മൂന്നാമത്തെ ദേവസ്വം ബോര്‍ഡ് പ്രസിഡന്റാണ് പ്രശാന്ത്. വ്യാഴാഴ്ച രാവിലെ കരകുളത്തെ വീട്ടിലെത്തിയാണ് പ്രത്യേക അന്വേഷണ സംഘം പ്രശാന്തിനെ കസ്റ്റഡിയിലെടുത്തത്. കൊല്ലം പൊലീസ് ക്ലബിലെത്തിച്ച് അറസ്റ്റ് രേഖപ്പെടുത്തി. 2019ലെ ശബരിമല സ്വര്‍ണക്കൊള്ള മറച്ചുവെക്കാനാണ് പ്രശാന്തിന്റെ കാലത്ത് 2025ല്‍ ദ്വാരപാലക പാളികള്‍ സ്വര്‍ണം പൂശാന്‍ ചെന്നൈ സ്മാര്‍ട്ട് ക്രിയേഷന്‍സിന് കൈമാറിയതെന്നാണ് പ്രത്യേക അന്വേഷണ സംഘത്തിന്റെ കണ്ടെത്തല്‍.എന്നാല്‍ ഹൈക്കോടതിയുടെ മുന്‍കൂര്‍ അനുമതി തേടാതിരുന്നത് സാങ്കേതിക പിഴവെന്നാണ് പ്രശാന്തിന്റെ വാദം.
