കോഴിക്കോട്:കുറ്റ്യാടി ചുരത്തില് കെഎസ്ആര്ടിസി വനിതാ സൗജന്യ യാത്രാ ബസിന്റെ ബ്രേക്ക് തകരാറിലായി.ഡ്രൈവറുടെ സമയോചിതമായ ഇടപെടലും മനസാന്നിധ്യവും കൊണ്ടാണ് വന് ദുരന്തം ഒഴിവായത്. ബുധനാഴ്ച രാവിലെ പത്തരയോടെ ചുരത്തിലെ എട്ടാം വളവിലായിരുന്നു സംഭവം.
തൊട്ടില്പ്പാലത്തുനിന്ന് മാനന്തവാടിക്ക് പോകുകയായിരുന്ന ബസിന്റെ ബ്രേക്കാണ് തകരാറിലായത്. പരിധിയിലേറെ യാത്രക്കാരുമായി ചുരം കയറുന്നതിനിടെ വാഹനത്തിന്റെ ബ്രേക്ക് പൂര്ണമായി തകരാറിലാവുകയുമായിരുന്നു.
ഇതോടെ നിയന്ത്രണം വിട്ട ബസ് പിന്നിലേക്ക് ഉരുളാന് തുടങ്ങി. യാത്രക്കാര് കൂട്ടനിലവിളിയായി.എന്നാല് ഡ്രൈവര് പേരാമ്പ്ര സ്വദേശി എന്.പി. സുധീര്, ബസിന്റെ പിന്ഭാഗം വലതുവശത്തെ സംരക്ഷണ ഭിത്തിയിലേക്ക് ഇടിപ്പിച്ചു നിര്ത്തുകയായിരുന്നു.
ഡ്രൈവറുടെ ഈ സമയോചിത ഇടപെടലാണ് അപകടത്തില് നിന്ന് മുഴുവന് യാത്രക്കാരുടെയും ജീവന് രക്ഷിച്ചത്. സംഭവത്തെ തുടര്ന്ന് ചുരത്തില് ഒരു മണിക്കൂറോളം ഗതാഗതം തടസപ്പെട്ടു.
