തിരുവനന്തപുരം: ഇന്നലെ വരെ രാഷ്‌ട്രീയമോ സാമുഹിക പ്രശ്നങ്ങളിലോ ഇടപെടാതിരുന്ന ഗായിക ജ്യോത്സന, നടി സിജ റോസ്, അവതാരക രഞ്ജിനി ഹരിദാസ് എന്നിവരെല്ലാം കോക്രോച്ച് ജനതാ പാര്‍ട്ടിയുടെ വരുതിയിലായതെങ്ങിനെ എന്നതില്‍ സംശയം ഉണരുന്നു. പെയ്ഡ് ആര്‍ടിസ്റ്റുകള്‍ എന്ന നിലയിലാണോ ഇവര്‍ കോക്രോച്ച് ജനതാ പാര്‍ട്ടിയുടെ പിന്തുണക്കാരായത് എന്നാണ് സംശയം. ഈ സമരം മോദി സര്‍ക്കാരിനെ അട്ടിമറിക്കാന്‍ വേണ്ടി നേപ്പാള്‍ മോഡലില്‍ നടത്താന്‍ ശ്രമിക്കുന്ന ഒരു ജെന്‍സീ കലാപമാണ്. അങ്ങിനെയുള്ള ഒരു ആസൂത്രിത സാമൂഹ്യ അട്ടിമറിക്ക് ഇവര്‍ അറിയാതെ ഇരയായതാണോ അതോ ഇവര്‍ക്ക് എന്തെങ്കിലും പേയ്‌മെന്‍റ് നല്‍കി വശീകരിച്ചതാണോ എന്നതാണ് ഇനിയും വെളിപ്പെടേണ്ടത്.
സാമൂഹ്യപ്രശ്നങ്ങളില്‍ ഇടപെടുന്ന സ്വഭാവക്കാരായ പാര്‍വ്വതി തിരുവോത്തിനെപ്പോലുള്ളവര്‍ ഇടപെടുന്നുണ്ടെങ്കില്‍ മനസ്സിലാക്കാം. ഇത്തരം വിഷയങ്ങളില്‍ ഇടപെട്ട ചരിത്രമില്ലാത്ത ജ്യോത്സയനും രഞ്ജിനി ഹരിദാസും എങ്ങിനെയാണ് സിജെപിയിലേക്ക് ആകര്‍ഷിക്കപ്പെട്ടതെന്നത് ദുരൂഹമായി തോന്നുന്നു.
കേരളത്തില്‍ അത്രയൊന്നും അറിയപ്പെടാത്ത സോനംവാങ്ചുകിനോടുള്ള ആരാധനയും സഹതാപവും മൂത്ത് കയ്യില്‍ നിന്ന് ഫ്ലൈറ്റിന് പണവും കൊടുത്ത് സിജെപി സമരത്തില്‍ പങ്കെടുക്കാന്‍ രഞ്ജിനി ഹരിദാസ് ദല്‍ഹിയില്‍ പോയി എന്നതില്‍ ദുുരഹതയുണ്ടെന്ന് പലരും അഭിപ്രായപ്പെടുന്നു. നീറ്റ് പരീക്ഷയിലെ എല്ലാ വീഴ്ചകളും തിരുത്തി, കുറ്റമറ്റ നീറ്റ് പുനപരീക്ഷ നടത്തിക്കഴിഞ്ഞ ശേഷം ഇത്തരമൊരു സമരത്തിന്റെ സാധുത തന്നെ ചോദ്യം ചെയ്യപ്പെടുകയാണ്. മാത്രമല്ല, ഈ സമരത്തിന് തെരഞ്ഞെടുത്ത സമയം തന്നെ പാര്‍ലമെന്‍റ് മണ്‍സൂണ്‍ കാലസമ്മേളനവുമായി ബന്ധപ്പെടുത്തിയാണ് എന്നതും സമരത്തിന് പിന്നിലെ ദുഷ്ടലാക്ക് വെളിവാക്കുന്നു.
ഇവരെക്കൂടാതെ ജാന്‍മണിയും പിന്തുണച്ചിട്ടുണ്ട്. വിദേശഫണ്ട് വാങ്ങി ഇന്ത്യയില്‍ പരിസ്ഥിതി, വിദ്യാഭ്യാസപ്രവര്‍ത്തനങ്ങള്‍ നടത്തുന്ന സോനം വാങ്ചുകിനോടുള്ള ആരാധനയാണ് ഇവരെ സിജെപിയിലേക്ക് ആകര്‍ഷിച്ചതെന്നാണ് ഇവരുടെ വാദം. വാസ്തവത്തില്‍ ആരാധന തോന്നാന്‍ മാത്രം അന്ന ഹസാഹെ പോലെ ഒരു ബിംബമൊന്നുമല്ല സോനം വാങ് ചുക്. ആദ്യ ഭാര്യയായ അമേരിക്കക്കാരിയായ റെബേക്ക നോര്‍മന്‍ വഴിയാണ് വിദേശഫണ്ട് സോനം വാങ്ചുകിന്റെ സംഘടനകള്‍ക്ക് കിട്ടാന്‍ തുടങ്ങിയത്. ആദ്യ ഭാര്യയുമായി വിവാഹ ബന്ധം വേര്‍പ്പെടുത്തിയ ശേഷമാണ് രണ്ടാമത്ത ഭാര്യയായ ഗീതാഞ്ജലി ആംഗ്മോ 2025ല്‍ ഭാര്യയായി എത്തിയത്. ഫോര്‍ഡ് ഫൗണ്ടേഷന്‍, റോക്ക് ഫെല്ലര്‍ ഫൗണ്ടേഷന്‍, ഡാനിഷ് ചര്‍ച്ച് തുടങ്ങിയ വിദേശസംഘടനകളുടെ പണം സോനം വാങ്ചുകിന് എത്തിയിരുന്നു. വിദേശ ഫണ്ടുകള്‍ ഇന്ത്യയിലേക്ക് വരുന്നതില്‍ കേന്ദ്രസര്‍ക്കാര്‍ പുതിയ എഫ് സിആര്‍എ ഭേദഗതി വരുത്തുന്നതാണ് സോനം വാങ്ചുക് ഉള്‍പ്പെടെയുള്ളവരെ ചൊടിപ്പിച്ചിരിക്കുന്നത്.
നേപ്പാളിലേതുപോലെ സമൂഹമാധ്യമത്തിലൂടെയാണ് സിജെപിയും കൂടുതല്‍ ആരാധകരേയും പ്രവര്‍ത്തകരേയും സംഘടിപ്പിക്കുന്നത്. ഇതില്‍ സെലിബ്രിറ്റികളായവരെ പേമെന്‍റ് നല്‍കി ആകര്‍ഷിക്കുന്നതായും പറയുന്നു. സോഷ്യല്‍ മീഡിയ ഇന്‍ഫ്ലുവന്‍സേഴ്സാണ് സെലിബ്രിറ്റികള്‍ക്ക് വന്‍തുക വാഗ്ദാനം ചെയ്തതായും റിപ്പോര്‍ട്ടുകളുണ്ട്. അന്വേഷണത്തിലൂടെ മാത്രമേ ഇതിന്റെ വസ്തുതകള്‍ പുറത്തുവരൂ. വെള്ളത്തുണിയില്‍ ഒരു ശവം പോലെ സോനം വാങ്ചുകിനെ അറസ്റ്റ് ചെയ്തു കൊണ്ടുപോകുന്നത് കണ്ട് മനസ്സലിഞ്ഞെന്നും പിറ്റേന്ന് രാവിലെ ഫ്ലൈറ്റ് പിടിച്ച് ദല്‍ഹിക്ക് എത്തിയെന്നുമാണ് രഞ്ജിനി ഹരിദാസ് പറയുന്നത്. ഇന്നുവരെ സാമൂഹ്യസമരങ്ങളില്‍ ഏര്‍പ്പെടാത്ത രഞ്ജിനി ഹരിദാസിനെപ്പോലുള്ളവര്‍ പൊടുന്നനെ സിജെപി എന്ന പാര്‍ട്ടിയോടും സോനം വാങ്ചുക് എന്ന നേതാവിനോടും കാണിക്കുന്ന ആരാധനയുടെ അടിത്തറ അന്വേഷണത്തിലൂടെ മാത്രമേ കണ്ടെത്താനാകൂ.
