ന്യൂദല്‍ഹി:. വിക്രം-1 റോക്കറ്റിനെ വിജയകരമായി ബഹിരാകാശത്തേക്ക് വിക്ഷേപിച്ച സ്കൈറൂട്ട് എയറോസ്പേസിന് പിന്നിലെ യുവതലമുറയെ പ്രശംസിക്കവെ, താൻ ഉദ്ദേശിച്ചത് 56 വയസ്സുള്ള ഒരു ‘യുവാവിനെ’ക്കുറിച്ചല്ലെന്ന് പ്രധാനമന്ത്രിയുടെ പ്രതികരണം. പ്രതിപക്ഷ നേതാവ് രാഹുല്‍ ഗാന്ധിക്കെതിരെയാണ് പ്രധാനമന്ത്രി പരോക്ഷമായി വിമര്‍ശനം നടത്തിയത്.
പ്രധാനമന്ത്രിയെ യുവാക്കള്‍ വെറുക്കുന്നുവെന്ന് സിജെപി സമരത്തെ മുന്‍നിര്‍ത്തി രാഹുല്‍ ഗാന്ധി നേരത്തെ വിമര്‍ശനം ഉന്നയിച്ചിരുന്നു. ഇതിന് മറുപടിയായാണ് മോദി യുവാക്കളെ വാഴ്‌ത്തിക്കൊണ്ടും 56 വയസ്സുള്ള യുവാവിനെ ഉദ്ദേശിച്ചല്ല എന്നും ഒളിയമ്പെയ്തത്.
സ്കൈറൂട്ടിന്റെ ഭാഗമായവരുടെ ശരാശരി പ്രായം വെറും 28 വയസ്സ് മാത്രമാണെന്ന് ചൂണ്ടിക്കാട്ടിയ പ്രധാനമന്ത്രി, ഇന്ത്യൻ യുവാക്കള്‍ ബഹിരാകാശത്ത് പുതിയൊരു യാത്രയ്‌ക്ക് തുടക്കം കുറിച്ചിരിക്കുകയാണെന്നും ഇവരെപ്പോലെയുള്ള യുവാക്കളാണ് ഈ നേട്ടം കൈവരിച്ചതെന്നും കൂട്ടിച്ചേർത്തു.
ഇതിന് പിന്നാലെയായിരുന്നു കോണ്‍ഗ്രസ് നേതാവ് രാഹുല്‍ ഗാന്ധിയെ ലക്ഷ്യമിട്ട്, താൻ 56 വയസ്സുള്ള യുവാവിനെക്കുറിച്ചല്ല സംസാരിക്കുന്നതെന്ന രാഷ്‌ട്രീയ പരിഹാസം പ്രധാനമന്ത്രി നടത്തിയത്. പാർലമെന്റിന്റെ മണ്‍സൂണ്‍ സമ്മേളനത്തിന് മുന്നോടിയായി ഡല്‍ഹിയില്‍ മാധ്യമപ്രവർത്തകരെ അഭിസംബോധന ചെയ്യുകയായിരുന്നു അദ്ദേഹം.
