പെരുവ: ക്ഷേത്രങ്ങളില്‍ ദേവീദേവന്മാരെ പൂജിക്കാനുള്ള ചെത്തിപ്പൂവ് ലഭിക്കാന്‍ ചെത്തികൃഷിതന്നെ നടത്തുകയാണ് പെരുവ കാരിക്കോട് കരിമ്പില്‍ അഖില്‍ കെ. ഭദ്രന്‍ എന്ന യുവ പൂജാരി. വീടിനു സമീപം 35 സെന്റോളം സ്ഥലത്ത് 600-ല്‍ അധികം ചെത്തിയാണ് ഇദ്ദേഹം നട്ടുപിടിപ്പിച്ചിരിക്കുന്നത്.
മുല്ലപ്പൂ, ജമന്തിപ്പു തുടങ്ങിയവ വ്യവസായിക അടിസ്ഥാനത്തില്‍ കൃഷി ചെയ്യാറുണ്ടെങ്കിലും ചെത്തിപ്പൂവ് ആരും കൃഷി ചെയ്യാറില്ലെന്ന് അഖില്‍ പറയുന്നു. കാരണം ഇത് പൂജാ ആവശ്യങ്ങള്‍ക്കല്ലാതെ ഉപയോഗിക്കുന്നത് വിരളമാണ്. ചെത്തിപ്പൂവ് കൃഷിയില്‍നിന്നും മാസം 10,000 മുതല്‍ 15,000 രൂപവരെ വരുമാനം ലഭിക്കുമെന്ന് അഖില്‍ പറയുന്നു. വീടിന് സമീപം തുളസിയും കൃഷിചെയ്യുന്നുണ്ട്.
മൂര്‍ക്കാട്ടിപ്പടി ഗുരുദേവ ക്ഷേത്രം, വടുകുന്നപുഴ ഗുരുദേവ ക്ഷേത്രം ഇടുക്കി വെണ്‍മണി ക്ഷേത്രം തുടങ്ങിയ ഇടങ്ങളില്‍ പൂജാരിയാണ് അഖില്‍. തന്റെ സുഹൃത്തുക്കളായ ക്ഷേത്ര പൂജാരിമാര്‍ മുഖേനേയാണ് പൂക്കള്‍ വില്‍ക്കുന്നത്. കര്‍ണാടക, തമിഴ്‌നാട്ടിലെ മധുര, കോയമ്പത്തൂര്‍ എന്നിവിടങ്ങളില്‍നിന്നാണ് സാധാരണ കേരളത്തിലേക്ക് ചെത്തിപ്പൂവ് കൊണ്ടുവരുന്നത്.
കിലോക്ക് 500 മുതല്‍ 700 രൂപവരെയാണ് വിപണിവില. വിശേഷാവസരങ്ങളിലും ഉത്സവ സീസണുകളിലും വിലഉയരുകയും ചെയ്യുന്നു. ഈ സാഹചര്യത്തില്‍ കേരളത്തില്‍ ചെത്തി കൃഷി ചെയ്ത് ഇവിടേക്കാവശ്യമുള്ള പൂവ് ഉത്പാദിപ്പിക്കാമെന്ന് കാണിച്ചുതരികയാണ് അഖില്‍.
