ഇച്ഛത്രീ സതീ സഹസ്രം
സ സഹസ്രഃ കോടി മിഹതേ കര്ത്തും
കോടിയുതോളപി നൃപത്വം
നൃപോളപി ബത ചക്രവര്ത്തിത്വം
നൂറു കൈവശമുള്ളവന് ആയിരം കിട്ടണമെന്നാഗ്രഹിയ്ക്കുന്നു. ആയിരമുള്ളവന് അത് കോടിയാകാന് ആഗ്രഹിയ്ക്കുന്നു .
കോടി കൈവശമുള്ളവന് രാജപദവിയിലാണ് ആശ. രാജാവായാല്ചക്രവര്ത്തിപദം ആഗ്രഹിയ്ക്കുന്നു. മതിവരാത്ത മനസ്സ് മലിനമാണ്. ആഗ്രഹം മനുഷ്യനെ ഭരിയ്ക്കുന്നു. ഏതൊ രാളെയും മുമ്പോട്ടു നയിയ്ക്കുന്നതും അതുതന്നെയാണ്. ആഗ്രഹങ്ങളാണ് മനുഷ്യനെ ഉയര്ച്ചയ്ക്ക് പ്രാപ്തനാക്കുന്നത്. അതായത്, നിരന്തരമായ ആശതന്നെയാണ് ഒരു വ്യക്തിയുടെ വളര്ച്ച നിര്ണ്ണയിയ്ക്കുന്നതും. എന്നാല്, ആശയാകുന്ന പാശം നമ്മുടെ വിശിഷ്ടമായ ചിന്താധാരയെ വികലമാക്കുന്നു. അതിരുമറന്ന ആഗ്രഹത്താല് പലതും ചെയ്തുപോയാല് ഉണ്ടാകാവുന്ന ഭവിഷ്യത്ത് മറ്റൊന്നാണ്. ദുരാഗ്രഹത്തിന്റെ പരിധിയില്ലാത്ത വഴിയിലേക്കു പതിച്ചാല് ആ ദുരാഗ്രഹം നമ്മെ നമ്മളല്ലാതെയാക്കുമെന്നതില് രണ്ടുപക്ഷമില്ല. മലീമസമായ മനസ്സ് മനുഷ്യജീവിതത്തെത്തന്നെ താളം തെറ്റിയ്ക്കും!
‘പത്തുകിട്ടുകില് നൂറുമതിയെന്നും
ശതമാകില് സഹസ്രം മതിയെന്നും
ആയിരംപണം കയ്യിലുണ്ടാകുമ്പോള്
ആയുതമാകിലാശ്ചര്യമെന്നതും
ആശയായുള്ള പാശമതിങ്കേന്നു
വേര്പിടാതെ കരേറുന്നു മേല്ക്കുമേല്!’
ഈവിധമുള്ള ആശ, ആര്ക്കും ഒരിയ്ക്കലും ഒരുവിധത്തിലും ആശാസ്യ ജനകമല്ല; ആത്മാഭിമാനപൂര്ണ്ണവുമല്ല. മറിച്ച്, ആത്മസംഘര്ഷമാണ് സൃഷ്ടിയ്ക്കുക. ജീവിതത്തില് നിരാശയെയും ദുഃഖത്തെയും സൃഷ്ടിയ്ക്കാതിരിയ്ക്കണമെങ്കില് ദുരാഗ്രഹമെന്ന ശാപം നമ്മെ ഗ്രസിക്കാതിരിക്കണം. സമൂഹവൃക്ഷത്തെ ഗ്രസിച്ചിരിയ്ക്കുന്ന ബീഭത്സവും അപകടകരവുമായ ഈ ദുരാശയുടെ വഴി സുഗമമല്ല; അതായത്, ദുര്ഗ്ഗമമെന്നുമാത്രമല്ല സുസ്സഹവുമാണ്. ഈ ദുഷ്കരതയില് നിന്നും നമുക്ക് ഒരു പുതിയ പ്രകാശത്തിന്റെ വഴി അവശ്യം ആവശ്യമാണുതന്നെ. ആശയായുള്ള പാശത്താല് ബന്ധനസ്ഥരാകാതെ ജീവിതത്തിന്റെ യഥാര്ത്ഥമായ ലാളിത്യത്തെ ആദരിച്ചും അംഗീകരിച്ചും വിനയാന്വിതമായി അനുഭവിച്ചും ജീവിയ്ക്കുകയാണ് നമുക്ക് എപ്പോഴും അഭികാമ്യം. ആഗ്രഹങ്ങളെ ബുദ്ധിപരതകൊണ്ട് നിയന്ത്രിയ്ക്കുകയും അതിന്റെ ന്യായാന്യായ -ധര്മ്മാധര്മ്മ – വശങ്ങളെ കണ്ടറിഞ്ഞു പ്രവര്ത്തിയ്ക്കുകയും ചെയ്യുമ്പോള് ആശ ആശങ്കയാവുകയില്ല. അതിരുകടന്ന ആഗ്രഹം മനസ്സിന് ഭീതി സൃഷ്ടിയ്ക്കിന്നതോടൊപ്പം അന്യരില് അതൃപ്തി ജനിപ്പിക്കുകയും ചെയ്യുന്നു. മാത്രമല്ല, നാം കാത്തുസൂക്ഷിക്കേണ്ടുന്ന നന്മയ്ക്ക് ശോഷണം സംഭവിയ്ക്കുകയും ചെയ്യുന്നു. നമ്മുടെ വികാരവിചാരങ്ങള് വികലവും അനിയന്ത്രിതവുമാകുന്നു. ഇത് ഒഴിവാക്കുവാനുള്ള വഴി ആഗ്രഹങ്ങളെ നിയന്ത്രിയ്ക്കുകയും വേണ്ടിവന്നാല് ത്യജിയ്ക്കുകയുമാണ്.
ജന്മഭൂമി ഓണ്ലൈന്