ന്യൂഡൽഹി : അള്ളാഹുവിനെ ആരാധിക്കുന്ന മുസ്ലീങ്ങൾക്ക് ആരെയും പേടിയില്ലെന്ന് ലഖ്നൗ ഈദ്ഗാഹ് ഇമാം മൗലാന ഖാലിദ് റാഷിദ് ഫിരംഗി മഹാലി. ഹിന്ദു രാഷ്ട്ര സങ്കൽപ്പത്തെ ആരും ഭയപ്പെടേണ്ടതില്ലെന്ന യോഗ ഗുരു ബാബാ രാംദേവിന്റെ പ്രസ്താവനയ്ക്കുള്ള പ്രതികരണമായിരുന്നു മൗലാനയുടെ ഈ പരാമർശം.
‘ എല്ലാ മനുഷ്യരും ഒരേ പൂർവ്വികരെ പങ്കിടുന്നു എന്നതാണ് സത്യം. മതത്തെ അടിസ്ഥാനമാക്കിയുള്ള വിവേചനത്തെ ഞങ്ങൾ മുസ്ലീങ്ങൾ എപ്പോഴും എതിർത്തിട്ടുണ്ട് . നമ്മുടെ രാജ്യത്തിന്റെ അവസ്ഥ മെച്ചപ്പെടുത്തണമെങ്കിൽ, എല്ലാവരും അവരവരുടെ മതം പിന്തുടരുകയും മറ്റുള്ളവരെ ബഹുമാനിക്കുകയും അത്തരം മതപരമായ പ്രസ്താവനകൾ നടത്തുന്നതിൽ നിന്ന് വിട്ടുനിൽക്കുകയും വേണം. ഉത്തരാഖണ്ഡിലെ പള്ളികൾ തകർക്കുന്നതും മദ്രസ ബോർഡ് നിർത്തലാക്കുന്നതും മുസ്ലീങ്ങൾക്ക് വലിയ ദുരിതവും കഷ്ടപ്പാടും ഉണ്ടാക്കുന്നു.‘ ഖാലിദ് റാഷിദ് ഫിരംഗി മഹാലി പറഞ്ഞു.
