ആലപ്പുഴ: ജി.സുധാകരന് എംഎല്എയുടെ ഓഫീസിലേക്ക് പ്രതിഷേധ മാര്ച്ച് നടത്തിയ സിപിഎം നേതാക്കള്ക്കെതിരെ അമ്പലപ്പുഴ പൊലീസ് കേസെടുത്തു. ഏരിയാ സെക്രട്ടറി സി. ഷാംജിയാണ് ഒന്നാം പ്രതി.
കണ്ടാലറിയാവുന്ന മറ്റ് 49 പേരും പ്രതിപ്പട്ടികയില് ഉണ്ട്. അമ്പലപ്പുഴ നീര്ക്കുന്നം സ്കൂളില് മണ്ണ് കടത്തലുമായി ബന്ധപ്പെട്ട് കഴിഞ്ഞ ദിവസത്തെ തര്ക്കമാണ് പരസ്യമായ പോരിലേക്കും പൊലീസ് കേസിലേക്കും എത്തിയത്.
സ്കൂള് കെട്ടിടം പൊളിച്ചശേഷം അനധികൃതമായി മണ്ണ് കടത്തുന്നു എന്ന ആരോപണം അന്വേഷിക്കാനാണ് ജി.സുധാകരന് കോണ്ഗ്രസ് പ്രവര്ത്തകര്ക്കൊപ്പം സ്ഥലത്തെത്തിയത്. എന്നാല് സുധാകരനെ അമ്പലപ്പുഴ വടക്ക് പഞ്ചായത്തിലെ മുന് പ്രസിഡന്റും സിപിഎം അംഗങ്ങളും ചേര്ന്ന് തടഞ്ഞതോടെയാണ് പ്രശ്നം വഷളായത്.
എച്ച്.സലാമിന്റെ മുന് പേഴ്സണല് സ്റ്റാഫ് അംഗവും സ്കൂള് പിടിഎ പ്രസിഡന്റുമായ പ്രശാന്ത് കുട്ടി, അമ്പലപ്പുഴ വടക്ക് പഞ്ചായത്ത് പ്രസിഡന്റ് ഹാരിസ് എന്നിവരും ഈ സമയം സ്കൂളിലുണ്ടായിരുന്നു. മണ്ണ് കടത്തല് ആരോപണത്തെച്ചൊല്ലി ഇരുകൂട്ടരും തമ്മില് വാക്കേറ്റമുണ്ടായി.
സുധാകരനെ നാട്ടുകാര് കൈകാര്യം ചെയ്യുമെന്ന സ്ഥിതി ഉണ്ടാകുമെന്ന് ഭീഷണിയും സി പി എം നേതാക്കളില് നിന്നുണ്ടായി.
