ആലപ്പുഴ: സി പി എം വിട്ട് യു ഡി എഫ് പിന്തുണയോടെ അമ്പലപ്പുഴയില്‍ വിജയിച്ച ജി സുധാകരനുംസി പി എം നേതാക്കളുമായുളള പോര് ശക്തം. രാത്രി പത്തരയ്‌ക്ക് ശേഷം സുധാകരന്‍ വിളിയ്‌ക്കുന്ന കോളിന്റെ ടോണും ലാസ്യഭാവവും അറിയാമെന്ന് സിപിഎം നേതാവും തെരഞ്ഞെടുപ്പില്‍ സുധാകരനോട് തോല്‍ക്കുകയും ചെയ്ത എച്ച് സലാം പറഞ്ഞു.
ഇതൊന്നും തങ്ങളെ കൊണ്ട് പറയിക്കരുത്. തെരഞ്ഞെടുപ്പില്‍ മല്‍സരിക്കുമ്പോള്‍ സുധാകരന്‍ സ്വന്തം നിലയ്‌ക്ക് പിരിച്ച ലക്ഷങ്ങളുടെ കണക്ക് പുറത്തു വിടണമെന്നും സലാം ആവശ്യപ്പെട്ടു.
ജി സുധാകരന്റെ ഓഫീസിലേക്ക് സി പി എം പ്രതിഷേധ പ്രകടനം നടത്തി. പ്രകടനത്തിന് ശേഷം സംസാരിച്ച സി പി എം ആലപ്പുഴ ജില്ലാ സെക്രട്ടറി ആര്‍ നാസര്‍, സുധാകരനെതിരെ ഭീഷണി മുഴക്കി. . കള്ളക്കേസെടുക്കുന്ന പൊലീസുകാരെ കൈകാര്യം ചെയ്യുമെന്ന് മുന്നറിയിപ്പ് നല്‍കിയ നാസര്‍, സുധാകരനെതിരെ രൂക്ഷവിമര്‍ശനം നടത്തി. ക്ഷമയ്‌ക്ക് പരിധിയുണ്ടെന്നും ഇതുപോലെയുള്ള പണികള്‍ അവസാനിപ്പിച്ചില്ലെങ്കില്‍ സുധാകരനെ ജനങ്ങള്‍ തന്നെ കൈകാര്യം ചെയ്യുന്ന സ്ഥിതിയുണ്ടാകുമെന്നും നാസര്‍ പറഞ്ഞു.
