കൊച്ചി: നോവല് കോപ്പിയടിച്ചെന്ന് ആരോപണമുന്നയിച്ചതിന് കെ ആര് മീര അയച്ച വക്കീല് നോട്ടീസിന് മറുപടി നല്കി എഴുത്തുകാരി ഹരിത സാവിത്രി. ആരോപണങ്ങള് അടിസ്ഥാനമില്ലാത്തതാണ്. സാമ്യം ചൂണ്ടിക്കാട്ടിയത് വായനക്കാരാണെന്നും അതില് തനിക്ക് ഉത്തരവാദിത്തമില്ലെന്നും ഹരിത സാവിത്രി മറുപടി നല്കി. ഫെയ്സ്ബുക്കിലൂടെയാണ് ഹരിതയുടെ പ്രതികരണം.
‘മുമ്പും വണ് ഡേ ഫ്രം എ ഹാങ്ങ് മാന്സ് ലൈഫ് എന്ന ഡോക്യുമെന്ററിയുമായും ശിലീഭൂതം എന്ന നോവലുമായും ബന്ധപ്പെട്ട് ഇത്തരം ആരോപണങ്ങള് ഉയര്ന്നിട്ടുണ്ട്. വാര്ത്തകളും ലേഖനങ്ങളും ചര്ച്ചകളും നടന്നിട്ടുണ്ട്. എന്നാല് തനിക്കെതിരെമാത്രം നിയമനടപടിയിലേക്ക് നീങ്ങിയത് പാട്രിയാര്ക്കല് മനോഭാവത്തിന്റെയും അരക്ഷിതബോധത്തിന്റെയും ലക്ഷണമാണ്. അപവാദ പ്രചാരണങ്ങള് പിന്വലിച്ചില്ലെങ്കില് താന് നേരിട്ട മനോവിഷമത്തിന് നിയമനടപടിയിലേക്ക് നീങ്ങേണ്ടി വരും.
തനിക്ക് ധാരാളം ജോലിയുണ്ട്. ജീവിതം അനിശ്ചിതത്വം നിറഞ്ഞതും നൈമിഷികവും ആണെന്ന് നന്നായറിയാവുന്ന ആളാണ് താന്. ഇതില് ഒന്നിലും ഒരു താല്പ്പര്യവുമില്ല. അനാവശ്യ കാര്യങ്ങള്ക്ക് കളയാന് സമയം ഇല്ലാത്തതിനാലാണ് കോടതി നടപടി അര്ഹിക്കുന്ന പലരുടെയും പ്രവൃത്തികള് അവഗണിച്ചത്. നന്നായി എഴുതുക എന്ന ലക്ഷ്യം മാത്രമാണ് മനസില്.വലിച്ചിഴയ്ക്കപ്പെടുകയാണ് ഇപ്പോഴെന്നും ഹരിത സാവിത്രി ഫെയ്സ്ബുക്കില് കുറിച്ചു.
ഹരിത സാവിത്രി തന്റെ നോവലായ ‘സിന്’ഉം ആയി കെ ആര് മീരയുടെ ‘കലാച്ചി’ക്ക് സാമ്യമുണ്ടെന്ന് ആരോപണമുന്നയിച്ചിരുന്നു. തുടര്ന്നാണ് മീര വക്കീല് നോട്ടീസയച്ചത്.
