ഇന്ത്യയുടെ വിപണി കീഴടക്കുന്ന ഡയമണ്ട് ആഭരണങ്ങള്‍….പ്രകൃതിദത്ത ഡയമണ്ടിനും ലാബില്‍ വളര്‍ത്തുന്ന ഡയമണ്ടിനും വന്‍ ഡിമാന്‍റ്

ന്യൂദല്‍ഹി: ഇന്ത്യയുടെ ഡയമണ്ട് കയറ്റുമതി കുറയുന്നുവെങ്കിലും ഇന്ത്യയ്‌ക്ക് ആശങ്കയില്ല. കാരണം ഇന്തയ്‌ക്കകത്തെ ‍ഡയമണ്ട് വില്‍പനയില്‍ വന്‍ കുതിപ്പാണ്. അതുകൊണ്ട് തന്നെ ടൈറ്റന്‍, സെന്‍കോഗോള്‍ഡ്, ബ്ലൂസ്റ്റോണ്‍ തുടങ്ങി നിരവധി ജ്വല്ലറികള്‍ ഡയമണ്ടില്‍ വന്‍നിക്ഷേപം ഇറക്കുകയാണ്.

രണ്ട് തരത്തില്‍ ഉള്ള ഡയമണ്ടുകളാണ് ഉള്ളത്. ഒന്ന് പ്രകൃതിദത്തവും മറ്റൊന്ന് ലാബുകളില്‍ വളര്‍ത്തുന്നവയും. ലാബില്‍ കൃത്രിമാന്തരീക്ഷത്തില്‍ വളര‍്ത്തുന്ന ഡയമണ്ടുകള്‍ക്ക് ആഗോളവിപണിയില്‍ വലിയ ഡിമാന്‍റാണിപ്പോള്‍. 2023ല്‍ യുഎസ് സന്ദര്‍ശിച്ചപ്പോള്‍ അന്നത്തെ യുഎസ് പ്രസിഡന്‍റ് ജോ ബൈഡന്റെ ഭാര്യ ജില്‍ ബൈഡന് 7.5 കാരറ്റിന്റെ ലാബില്‍ വികസിപ്പിച്ച ഡയമണ്ടാണ് മോദി സമ്മാനമായി നല്‍കിയത്. ഇതിന്റെ വില 20000 യുഎസ് ഡോളര്‍ (ഏകദേശം 19 ലക്ഷം രൂപ) ആണ്.

2024ല്‍ ഇന്ത്യയുടെ ഡയമണ്ട് കയറ്റുമതി 1.32 ലക്ഷം കോടിയായിരുന്നെങ്കില്‍ 2025ല്‍ അത് 1.12 ലക്ഷം കോടി രൂപയും 2026ല്‍ അത് 1.07 ലക്ഷം കോടി രൂപയും ആയി താഴ്ന്നു. അതേ സമയം ഇന്ത്യയ്‌ക്കകത്തെ ഡയമണ്ട് ആഭരണങ്ങളുടെ വില്‍പന കുത്തനെ കൂടി. ഇന്ത്യയില്‍ യുവാക്കള്‍ക്കിടയില്‍ പര്‍ചേസിംഗ് പവര്‍ കൂടുന്നതാണ് ഇതിന് ഒരു കാരണം. മറ്റൊന്ന് ഡയമണ്ട് കൂടുതല്‍ ട്രെന്‍ഡായി മാറുന്നു എന്നതാണ്. നിത്യോപയോഗത്തിനുള്ള ആഭരണങ്ങളായി ഇപ്പോള്‍ ഡയമണ്ട് മാറിക്കഴിഞ്ഞു. നേരത്തെ വിശേഷാവസരങ്ങളില്‍ മാത്രം ധരിക്കുന്ന ഒന്നായിരുന്നു ഡയമണ്ട്.

കയറ്റുമതി കുറഞ്ഞാലും ജ്വല്ലറികള്‍ ഡയമണ്ട് ആഭരണരംഗത്ത് കൂടുതല്‍ മുതല്‍ മുടക്കുകയാണ്. ടൈറ്റന്‍ എന്ന കമ്പനി പറയുന്നത് ഭാരം കുറഞ്ഞ, നല്ല ഡിസൈനുകളോട് കൂടിയ ഡയമണ്ടുകള്‍ക്ക് വന്‍ഡിമാന്‍റാണ് എന്നാണ്. ഉപഭോക്താക്കളെ പ്രകൃതിദത്ത ഡയമണ്ടുകളും ലാബില്‍ വികസിപ്പിച്ച ഡയമണ്ടുകളും തമ്മിലുള്ള വ്യത്യാസം പഠിപ്പിക്കുന്നതില്‍ ടൈറ്റന്‍ പ്രത്യേകം ശ്രദ്ധപുലര്‍ത്തുന്നു. ടൈറ്റന് കീഴിലുള്ള തനിഷ്ക്, സോയ, മിയ, കാരറ്റ് ലെയിന്‍ തുടങ്ങിയ ബ്രാന്‍റുകളുടെ വളര്‍ച്ച 2025ലും 2026ലും ഗംഭീരമായിരുന്നു. ഇതിന് കാരണം ഇവിടുത്തെ ഡയമണ്ട് ആഭരണങ്ങളാണ്.

ഇന്ത്യയില്‍ നല്ല വരുമാനം നേടുന്ന യുവാക്കള്‍ക്കിടയിലാണ് ഡയമണ്ടിന് വലിയ ഡിമാന്റെന്ന് ബ്ലൂസ്റ്റോണ്‍ ജ്വല്ലറി കമ്പനി സിഇഒ ഗൗരവ് സിങ്ങ് കുശ്വാഹ പറയുന്നു. വലിയ മെട്രോ നഗരങ്ങളില്‍ മാത്രമല്ല, ടിയര്‍2, ടിയര്‍ 3 നഗരങ്ങളിലും ഡയമണ്ട് ആഭരണങ്ങളോടുള്ള പ്രിയം വര്‍ധിക്കുന്നു.

സെന്‍കോ ഗോള്‍ഡ് എന്ന കമ്പനി കൂടുതല്‍ ശ്രദ്ധകേന്ദ്രീകരിക്കുന്നത് ലാബില്‍ വളര്‍ത്തുന്ന ഡയമണ്ടുകളിലാണ്. ഇന്ത്യയിലെ യുവതലമുറയ്‌ക്കിടയില്‍ വലിയ ഡിമാന്‍റാണ് ഇവരുടെ ലാബ് ഡയമണ്ട് ആഭരണ ബ്രാന്‍റാണ് സെന്നസ്.