പാലക്കാട്: നെല്ലിയാമ്പതി ചുരത്തില് രാത്രികാല ഗതാഗതത്തിനും വിനോദസഞ്ചാരത്തിനും കര്ശന നിയന്ത്രണം ഏര്പ്പെടുത്തി. ജില്ലയില് കാലവര്ഷം തുടരുന്നതിനാലും നെല്ലിയാമ്പതി ചുരം റോഡില് കനത്ത പാറവീഴ്ചയ്ക്കും മണ്ണിടിച്ചിലിനും സാധ്യത നിലനില്ക്കുന്നതിനാലും പൊതുജന സുരക്ഷ മുന്നിര്ത്തിയാണ് കര്ശന യാത്രാ നിയന്ത്രണങ്ങള് ഏര്പ്പെടുത്തി ജില്ലാ കളക്ടര് ഉത്തരവ് പുറപ്പെടുവിച്ചത്. ഇനിയൊരു ഉത്തരവുണ്ടാകുന്നത് വരെ വിനോദസഞ്ചാര ആവശ്യങ്ങള്ക്കുള്ള എല്ലാവിധ യാത്രകളും, ചുരം വഴിയുള്ള ഭാരവാഹനങ്ങളുടെ ഗതാഗതവും നിരോധിച്ചിട്ടുണ്ട്.
പ്രദേശവാസികളുടെ അത്യാവശ്യ യാത്രകള്ക്കും അടിയന്തര വൈദ്യസഹായ ആവശ്യങ്ങള്ക്കുമുള്ള വാഹനങ്ങള്ക്കൊഴികെ മറ്റെല്ലാ വാഹനങ്ങള്ക്കും വൈകുന്നേരം 6 മുതല് രാവിലെ 6 മണിവരെ രാത്രികാല യാത്രാ നിയന്ത്രണവും ഏര്പ്പെടുത്തി.
അതേസമയം, കേരളത്തില് അടുത്ത അഞ്ച് ദിവസങ്ങളില് ശക്തമായ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ഇത് പ്രകാരം വിവിധ ജില്ലകളില് കേന്ദ്ര കാലാവസ്ഥ വകുപ്പ് ഓറഞ്ച്, മഞ്ഞ ജാഗ്രത പ്രഖ്യാപിച്ചു. കണ്ണൂര്, കാസര്ഗോഡ് ജില്ലകളില് അതിശക്തമായ മഴയ്ക്കുള്ള സാധ്യത മുന്നിര്ത്തി ശനിയാഴ്ച ഓറഞ്ച് ജാഗ്രത പ്രഖ്യാപിച്ചിട്ടുണ്ട്.
