കൽപ്പറ്റ: ലയണൽ മെസി, ക്രിസ്റ്റ്യാനോ റൊണാൾഡോ, നെയ്‌മർ, കിലിയൻ എംബാപ്പെ- ഈ നാല് സൂപ്പര്‍ താരങ്ങളേയും സ്നേഹിക്കുന്ന ഭക്തന്റെ വക ഇവര്‍ക്ക് നാല് പേര്‍ക്കും സൂക്തപുഷ്പാഞ്ജലി.
പിതൃക്കളുടെ മോക്ഷ പ്രാപ്തിക്കായുള്ള ബലി തർപ്പണത്തിന് പേര് കേട്ട വയനാട്ടിലെ തിരുനെല്ലി ക്ഷേത്രത്തിലാണ് ഈ ഭക്തന്‍ ഈ നാല് സൂപ്പര്‍താരങ്ങളുടേയും പേരില്‍ സൂക്തിപുഷ്പാഞ്ജലി കഴിച്ചത്.
എന്താണ് സൂക്തപുഷ്പാഞ്ജലി?
ഹിന്ദു ക്ഷേത്രങ്ങളിൽ നടത്തുന്ന പ്രധാനപ്പെട്ട ഒരു വഴിപാടാണ് സൂക്തപുഷ്പാഞ്ജലി. പൂജാരി ദേവതകൾക്ക് മന്ത്രങ്ങൾ ജപിച്ച് പുഷ്പങ്ങൾ അർപ്പിക്കുന്നതിനെയാണ് ‘പുഷ്പാഞ്ജലി’ എന്ന് പറയുന്നത്. ഇതിൽ വേദങ്ങളിലെ ‘സൂക്തങ്ങൾ’ (പ്രത്യേക മന്ത്രസമൂഹങ്ങൾ) ജപിച്ച് പുഷ്പാഞ്ജലി നടത്തുമ്പോൾ അതിനെ സൂക്തപുഷ്പാഞ്ജലി എന്ന് വിളിക്കുന്നു. കാര്യ സാധ്യത്തിനു വേണ്ടി നടത്തുന്ന പ്രധാന വഴിപാടുകളിലൊന്നാണ് സൂക്ത പുഷ്പാഞ്ജലി.
ഒരു സൂക്ത പുഷ്പാഞ്ജലിക്ക് 15 രൂപയാണ് വഴിപാട് നിരക്ക്. നാല് താരങ്ങളുടേയും പേര് ഒറ്റ രസീതിയിൽ അടിച്ച് 60 രൂപയാണ് ഭക്തൻ കൈമാറിയത്. ശനിയാഴ്ച രാവിലെ 10.30 ഓടെയാണ് വഴിപാട് രസീതിയാക്കിയത്. വഴിപാട് കഴിപ്പിച്ചതാരാണെന്നു വ്യക്തമല്ല. വഴിപാട് രസീതി സമൂഹ മാധ്യമങ്ങളിൽ പ്രചരിച്ചിരുന്നു. ഇക്കാര്യം ദേവസ്വം അധികൃതരും സ്ഥിരീകരിച്ചിട്ടുണ്ട്.
