തിരുവനന്തപുരം: കോര്പ്പറേഷനിലെ സിപിഎം കൗണ്സിലര്മാര് നടത്തിയ അക്രമം സിപിഎം നേതാക്കള് നടത്തിയ ഗൂഢാലോചയുടെ ഭാഗം. ബിജെപി കൗണ്സിലര്മാരെ എങ്ങനെ ആക്രമിക്കണമെന്ന് പദ്ധതിയും തയ്യാറാക്കി. സിപിഎം ജില്ലാ സെക്രട്ടറി വി.ജോയി എംഎല്എ, മുന്മന്ത്രിമാരായ കടകംപള്ളി സുരേന്ദ്രന്, വി.ശിവന്കുട്ടി, സിപിഎം കൗണ്സിലര് വഞ്ചിയൂര് ബാബുവും ചേര്ന്നായിരുന്നു അക്രമത്തിന്റെ തിരക്കഥ തയ്യാറാക്കിയത്.
ഹൈക്കോടതി വിധിയെ തുടര്ന്ന് ബിജെപി അംഗങ്ങള് വീണ്ടും നടത്തിയ സത്യപ്രതിജ്ഞ സിപിഎമ്മിനെ ഞെട്ടിച്ചിരുന്നു. ഇതിന് പ്രതികാരമെന്നോണമാണ് സംഘര്ഷം ഉണ്ടാക്കാന് കണക്കാക്കി ഇടത് കൗണ്സിലര്മാര് കോര്പ്പറേഷനില് എത്തിയത്. ഇതനുസരിച്ച് കോര്പ്പറേഷനില് പ്രതിഷേധം ഉയര്ത്തി സംഘര്ഷം നടത്തണമെന്ന് ജില്ലാ കമ്മറ്റി സിപിഎം കൗണ്സിലര്മാര്ക്ക് നിര്ദ്ദേശം നല്കി. സിപിഎം കൗണ്സില് പാര്ട്ടി ലീഡര് ദീപകും വഞ്ചിയൂര് ബാബുവും സിപിഎം എടുത്ത തീരുമാനം മറ്റ് എല്ഡിഎഫ് കൗണ്സിലര്മാരെ അറിയിച്ച് പദ്ധതി തയ്യാറാക്കി.
എന്തു വന്നാലും മേയറെ ചേമ്പറില് കടത്താന് പാടില്ലെന്നായിരുന്നു പ്രധാന തീരുമാനം. ഇതനുസരിച്ച് വഞ്ചിയൂര് ബാബുവും മുന് മേയര് ശ്രീകുമാറും മേയറുടെ വാതിലിനു മുന്നില് തന്നെ കസേരയിട്ട് ഇരുന്നു. ചുറ്റും വളഞ്ഞ് വനിതാ കൗണ്സിലര്മാരെ ഇരുത്തി. മേയര് എത്തിയ ഉടനെ ഓഫീസിലേക്ക് കടത്തി വിടില്ലെന്നും അങ്ങനെ വന്നാല് സംഘര്ഷം ഉണ്ടാക്കുമെന്നും വഞ്ചിയൂര് ബാബു മുന്നറിയിപ്പ് നല്കി. എന്നാല് മേയര്ക്ക് ചേമ്പറിലേക്ക് പോകാന് നഗരസഭാ സുരക്ഷാ ഉദ്യോഗസ്ഥര് വഴിയൊരുക്കി. ഇതോടെ വഞ്ചിയൂര് ബാബു ഗുണ്ടയെ പോലെ മേയറെ തള്ളിമാറ്റി.
നികുതി അപ്പീല്കാര്യ സ്റ്റാന്റിങ്ങ് കമ്മറ്റി ചെയര്പേഴ്സണ് സിന്ധു ശശി മേയറെ കാലില് പിടിച്ച് വലിച്ച് തള്ളിയിടുകയായിരുന്നു. പിന്നാലെ ചെന്ന ബിജെപി കൗണ്സിലര്മാരെയും ഇതേ രീതിയില് വലിച്ച് താഴയിട്ട ശേഷമായിരുന്നു മര്ദ്ദനം. ബിജെപി കൗണ്സിലര്മാര് മര്ദ്ദിച്ചെന്ന് വരുത്തി തീര്ക്കാന് വഞ്ചിയൂര് ബാബു താന് ഇരുന്ന കസേരയിലേക്ക് സിന്ധു ശശിയെ പിടിച്ചു തള്ളുകയായിരുന്നു. സംഘര്ഷത്തിന്റെ വിവരം തല്സമയം സിപിഎം നേതാക്കളെ അറിയിച്ചു കൊണ്ടിരുന്നു. പോലീസ് എത്തിയപ്പോള് നേതാക്കളും അവിടെ എത്തി അക്രമികള്ക്ക് വേണ്ട പിന്തുണ നല്കുകയായിരുന്നു. പോലീസിനെ ഭീഷണിപ്പെടുത്തി അവിടെ നിന്ന് മാറ്റിയ്ക്കുകയും ചെയ്തു.
സംഘര്ഷത്തില് സിപിഎം കൗണ്സിലര്മാരെ ബിജെപിക്കാര് മര്ദ്ദിച്ചെന്ന് വരുത്തി തീര്ക്കാന് രംഗം ചിത്രീകരിച്ച് ഫോട്ടോ എടുത്ത് ദേശാഭിമാനിയില് പ്രസിദ്ധീകരിച്ചു. സംഘര്ഷത്തില് ബിജെപി അംഗങ്ങള്ക്കാണ് പരിക്കേറ്റത്. സിപിഎം കൗണ്സിലര്മാര്ക്ക് പരിക്കേറ്റിരുന്നില്ല. എന്നാല് ബിജെപി അംഗങ്ങള്ക്കെതിരെ പരാതി നല്കാന് തങ്ങളെ മര്ദ്ദിച്ചെന്ന് വരുത്തി തീര്ക്കാന് കെ.ശ്രീകുമാറിനും എല്ഡിഎഫ് കൗണ്സില് പാര്ട്ടി ലീഡര് ദീപക്കിനും മര്ദ്ദനമേറ്റ് തെറിച്ച് കിടക്കുന്ന തരത്തില് രംഗം ചിത്രീകരിക്കുകയായിരുന്നു.
എന്നാല് ദീപക് നിലത്ത് കിടന്ന് നിറഞ്ഞ പുഞ്ചരിയോടെ തല ഉയര്ത്തി ഫോട്ടോക്ക് പോസ് ചെയ്യുന്നതായിട്ടാണ് തെറിച്ചുവീണ് കിടക്കുന്ന ഫോട്ടോയില് കാണുന്നത്. ശ്രീകുമാറാകട്ടെ ഒരു കൈയ്യില് മൊബൈല് പിടിച്ചുകൊണ്ട് മറ്റേ കൈ കൊണ്ട് കുത്തി ഇരുന്ന് മുഖത്ത് വേദന വരുന്ന തരത്തില് അഭിനയിച്ചും. അടി കൊണ്ട് തെറിച്ച് വീണപ്പോള് മൊബൈല് കൈയ്യില് നിന്നും വീഴാതരിക്കാനുള്ള വിദ്യ സിപിഎമ്മിന്റെ സ്റ്റഡി ക്ലാസിലെ പരിശീലനം കൊണ്ടാണെന്ന് വ്യക്തം. ശ്രീകുമാറിന്റെ ഇരുപ്പ് കണ്ടാല് സിനിമയല് ഹാസ്യ സംഘര്ഷത്തില് കരമന ജനാര്ദ്ദനന് അടികൊണ്ട് വീഴുന്ന തരത്തില്. ദേശാഭിമാനിയില് പ്രസിദ്ധീകരിച്ച ഈ ചിത്രം സാമൂഹിക മാധ്യമങ്ങളില് വൈറലാണ്.
