ഗൗഡലാജാറ (മെക്സിക്കോ): ഇരുപത്തിമൂന്നാം ലോകകപ്പിലെ ഗ്രൂപ്പ് എയിലെ ആദ്യ മത്സരത്തില്‍ ദക്ഷിണ കൊറിയയ്ക്ക് എതിരാളികള്‍ യൂറോപ്യന്‍ കരുത്തുമായെത്തുന്ന ചെക്ക് റിപ്പബ്ലിക്ക്. 12-ാം തവണയാണ് ദക്ഷിണ കൊറിയ ലോകകപ്പില്‍ കളിക്കാനിറങ്ങുന്നത്. 2002-ല്‍ ജപ്പാനിലും കൊറിയയിലുമായി നടന്ന ലോക മാമാങ്കത്തില്‍ നാലാം സ്ഥാനം നേടിയതാണ് ദക്ഷിണ കൊറിയയുടെ ഏറ്റവും മികച്ച പ്രകടനം. 2010, 2022 ലോകകപ്പില്‍ പ്രീ ക്വാര്‍ട്ടറിലെത്തി. അതേസമയം ചെക്ക് റിപ്പബ്ലിക്ക് 2006നുശേഷം ആദ്യമായാണ് ലോകകപ്പില്‍ കളിക്കാനിറങ്ങുന്നത്. ചെക്കോസ്ലാവാക്യയായി കളിച്ചിരുന്ന 1934, 1962 ലോകകപ്പില്‍ റണ്ണേഴ്സായിരുന്നു.
അത്ഭുതങ്ങള്‍ തീര്‍ക്കുന്ന കൊറിയ
ഏഷ്യന്‍ യോഗ്യതായുടെ മൂന്നാം റൗണ്ടില്‍ ജേതാക്കളായാണ് ദക്ഷിണ കൊറിയ ലോകകപ്പ് ടിക്കറ്റ് സ്വന്തമാക്കിയത്. കളിച്ച 10ല്‍ ആറ് വിജയവും നാല് സമനിലയുമാണ് അവര്‍ നേടിയത്. കഴിഞ്ഞ ഖത്തര്‍ ലോകകപ്പില്‍ ഗ്രൂപ്പ് എച്ചിലെ അവസാന പോരാട്ടത്തില്‍ കരുത്തരായ പോര്‍ച്ചുഗലിനെ അട്ടിമറിച്ച് പ്രീക്വാര്‍ട്ടറില്‍ പ്രവേശിച്ച രാജ്യമാണ് ദക്ഷിണ കൊറിയ. മികച്ച പ്രതിരോധവും അതിവേഗ പ്രത്യാക്രമണവുമാണ് അവരുടെ ശക്തി. 35 വയസ്സുള്ള ഒന്നാം നമ്പര്‍ ഗോള്‍ കീപ്പര്‍ കിം സ്യുങ് ഗ്യു ആണ് ടീമിലെ കാരണവര്‍. 144 കളികളില്‍ രാജ്യത്തെ പ്രതിനിധീകരിച്ച നാലാം ലോകകപ്പ് കളിക്കാനിറങ്ങുന്ന സണ്‍ ഹ്യുങ് മിന്‍ ആണ് നായകന്‍. 144 കളികളില്‍ നിന്ന് രാജ്യത്തിനായി 56 ഗോളുകളും നേടിയിട്ടുണ്ട് ലോസ് ആഞ്ചലസ് എഫ്സിക്കായി കളിക്കുന്ന ഈ താരം. ബയേണ്‍ മ്യൂണിച്ച് താരം കിം മിന്‍ ജെ, ബൊറൂസിയ മൊന്‍ചെന്‍ഗ്ലാബാച്ച് താരം ജെന്‍സ് കാസ്ട്രോപ്, പിഎസ്ജിയുടെ ലീ കാങ് ഇന്‍ തുടങ്ങി യൂറോപ്പിലെ പ്രമുഖ ലീഗുകളില്‍ കളിക്കുന്ന പരിചയസമ്പന്നരുമടങ്ങിയതാണ് കോച്ച് ഹോങ് മ്യുങ്-ബോ പരിശീലിപ്പിക്കുന്ന ദക്ഷിണ കൊറിയന്‍ ടീം.
സാധ്യതാ ടീം: കിം സ്യുങ് ഗ്യു, കിം മിന്‍ജെ, ലീ ഹാന്‍ബിയോം, സിയോള്‍ യങ്വൂ, ലീ കിഹ്യുക്ക്, ലീ ടെയ്‌സോക്ക്, ഹ്വാങ് ഇന്‍ബിയോം, പൈക് സിയുങ്ഹോ, ലീ കാംഗിന്‍, ലീ ജെയ്‌സങ്, സണ്‍ ഹ്യൂങ്മിന്‍.
യുവത്വത്തിന് മുന്‍ഗണന നല്‍കി ചെക്ക്
യുവത്വത്തിനും പരിചയസമ്പത്തിനും മുന്‍ഗണന നല്‍കിയ ടീമുമായാണ് ചെക്ക് റിപ്പബ്ലിക്ക് 20 വര്‍ഷത്തെ ഇടവേളയ്‌ക്കുശേഷം ലോകകപ്പ് കളിക്കാനെത്തുന്നത്. യൂറോപ്യന്‍ യോഗ്യാ റൗണ്ടില്‍ ഗ്രൂപ്പ് എല്ലില്‍ നിന്ന് ക്രൊയേഷ്യക്ക് പിന്നില്‍ രണ്ടാം സ്ഥാനക്കാരായി മുന്നേറി അയര്‍ലന്‍ഡിനെയും ഡെന്മാര്‍ക്കിനെയും ഷൂട്ടൗട്ടിലേക്ക് നീണ്ട പ്ലേ ഓഫില്‍ പരാജയപ്പെടുത്തിയാണ് ചെക്ക് റിപ്പബ്ലിക്ക് അമേരിക്കന്‍ ടിക്കറ്റ് സ്വന്തമാക്കിയത്. അതിനുശേഷം നടന്ന രണ്ട് സൗഹൃദ മത്സരത്തില്‍ വിജയിക്കുകയും ചെയ്തു. 27 കാരനായ ലാഡിസ്ലാവ് ക്രെജിക്കാണ് ടീമിന്റെ നായകന്‍. 90 മത്സരങ്ങള്‍ കളിച്ച് തോമസ് സൂസെക്, 79 മത്സരങ്ങള്‍ കളിച്ച വ്ളാഡിമിര് ഡാരിഡ എന്നിവരാണ് ടീമിലെ ഏറ്റവും പരിചയസമ്പന്നര്‍. 26 വയസ്സുള്ള മാറ്റേജ് കോവാര്‍ ഗോള്‍വലയ്‌ക്ക് മുന്നില്‍ ഇടംപിടിക്കുമ്പോള്‍ പ്രതിരോധത്തിന് ചുക്കാന്‍ പിടിക്കുക നായകന്‍ തന്നെ. കൂട്ടിന് വ്ളാഡിമിര് കൗഫല്‍, ഡേവിഡ് ഡൗഡേര, തോമസ് ഹോള്‍സ് എന്നിവരും. മധ്യനിരയില്‍ കല്‍മെനയാന്‍ തോമസ് സൂസെക്, മൈക്കല്‍ സാഡിലെക്, പവേല്‍ സുല്‍ക് എന്നിവരും മുന്നേറ്റത്തില്‍ പാട്രിക് ഷിക്കും ഇറങ്ങിയേക്കും.
സാധ്യതാ ഇലവന്‍: കോവാര്‍, വ്ളാഡിമിര് കൗഫല്‍, ഡേവിഡ് ഡൗഡേര, തോമസ് ഹോള്‍സ്, ക്രെജി, സെലെനി, സൂസെക്, സാഡിലെക്, ആദം ഹ്ലോസെക്, പാവല്‍ സുല്‍ക്, പാട്രിക് ഷിക്ക്.
