ഇന്ത്യയുമായുള്ള വ്യാപാരകരാര്‍ വൈകില്ലെന്ന് ട്രംപ്, മോദി ഒരു നല്ല സുഹൃത്താണെന്നും പ്രശംസ

വാഷിംഗ്ടണ്‍: അമേരിക്കയും ഇന്ത്യയും ഉടന്‍ വ്യാപാര കരാറിലെത്തുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്.
വ്യാപാര അസന്തുലിതാവസ്ഥയില്‍ നിന്ന് വര്‍ഷങ്ങളായി ഇന്ത്യയ്‌ക്ക് നേട്ടമുണ്ടായിട്ടുണ്ടെന്നും എന്നാല്‍ ഇപ്പോള്‍ സ്ഥിതി മാറിയിട്ടുണ്ടെന്നും മാധ്യമപ്രവര്‍ത്തകരോട് സംസാരിക്കവെ ട്രംപ് പറഞ്ഞു.
‘നിങ്ങളുടെ പ്രധാനമന്ത്രിയെ എനിക്ക് വളരെ ഇഷ്ടമാണ്. അദ്ദേഹം എന്റെ ഒരു നല്ല സുഹൃത്താണ്, ഞങ്ങള്‍ തമ്മില്‍ നല്ല ബന്ധമുണ്ട്. ‘ ട്രംപ് ഇന്ത്യന്‍ മാധ്യമപ്രവര്‍ത്തകരോട് പറഞ്ഞു.
‘വര്‍ഷങ്ങളായി ഇന്ത്യ അമേരിക്കയെ മുതലെടുത്തു. അവര്‍ ഞങ്ങളില്‍നിന്ന് വലിയ താരിഫ് ഈടാക്കി, പകരം ഒന്നും നല്‍കിയില്ല. ഇപ്പോള്‍ അങ്ങിനെയല്ല, ഞങ്ങള്‍ ഇന്ത്യയില്‍ നിന്ന് പണം സമ്പാദിക്കുന്നുണ്ട്. പക്ഷേ ഞങ്ങള്‍ ഒരു കരാറിലെത്തും,’ അദ്ദേഹം കൂട്ടിച്ചേര്‍ത്തു.
ഇന്ത്യയുള്‍പ്പെടെ 60 രാജ്യങ്ങളില്‍ നിന്നുള്ള ഇറക്കുമതിക്ക് 12.5% അധിക തീരുവ ചുമത്താന്‍ ട്രംപ് ഭരണകൂടം നിര്‍ദ്ദേശിച്ചതിന് പിന്നാലെയാണ് അദ്ദേഹത്തിന്റെ ഈ പരാമര്‍ശം.
അതിനിടെ, ഇന്ത്യയും അമേരിക്കയും ഇതിനിടെ ന്യൂദല്‍ഹിയില്‍ നാല് ദിവസത്തെ വ്യാപാര ചര്‍ച്ചകള്‍ പൂര്‍ത്തിയാക്കിക്കഴിഞ്ഞു.