തിരുവനന്തപുരം: 2025 ലെ മണ്ഡലകാലത്ത് ശബരിമല ശ്രീ ധര്മ്മശാസ്താ ക്ഷേത്രത്തിലേക്ക് നെയ്യ് എത്തിക്കുന്നതില് മില്മയുടെ ഭാഗത്തുനിന്ന് യാതൊരു വീഴ്ചയും ഉണ്ടായിട്ടില്ലെന്ന് തിരുവനന്തപുരം റീജിയണല് കോ-ഓപ്പറേറ്റീവ് മില്ക്ക് പ്രൊഡ്യൂസേഴ്സ് യൂണിയന് (ടിആര്സിഎംപിയു) അറിയിച്ചു.
കരാര് പ്രകാരം ക്ഷേത്രത്തിലേക്ക് ആവശ്യമായ അളവില് നെയ്യ് എത്തിക്കുന്നതില് മില്മയുടെ പത്തനംതിട്ട ഡെയറി എല്ലാ നിയമാനുസൃത നടപടിക്രമങ്ങളും ഗുണനിലവാര മാനദണ്ഡങ്ങളും കര്ശനമായി പാലിച്ചിരുന്നു. കൃത്യമായ അളവിലും ഗുണനിലവാരത്തിലും ക്ഷേത്രത്തില് നെയ്യ് ലഭിച്ചിട്ടുണ്ടെന്ന സ്ഥിരീകരണം ദേവസ്വം അധികൃതരില് നിന്നും ഡെയറി അധികൃതര്ക്ക് ലഭിച്ചു. അതനുസരിച്ച് കണക്കുകള് തീര്പ്പാക്കി.
ക്ഷീരകര്ഷകരുടെ അഭിവൃദ്ധിക്കും ക്ഷേമത്തിനും വേണ്ടി പ്രതിജ്ഞാബദ്ധമായി പ്രവര്ത്തിക്കുന്ന ഒരു സഹകരണ പ്രസ്ഥാനമെന്ന നിലയില് ശബരിമല ക്ഷേത്രത്തിലേക്ക് നെയ്യ് വിതരണം ചെയ്യുന്നതിനായി തിരുവിതാംകൂര് ദേവസ്വം ബോര്ഡുമായി ഉണ്ടാക്കിയ കരാര് ഒരു ചരിത്രപരമായ നേട്ടമായി മില്മ കണക്കാക്കി.
ഈ നേട്ടത്തില് കരിനിഴല് വീഴ്ത്താനും സമാന സ്വഭാവമുള്ള കൂടുതല് ഇടപെടലുകളില് നിന്ന് ടിആര്സിഎംപി യുവിനെ നിരുത്സാഹപ്പെടുത്താനും ചില കോണുകള് കിംവദന്തികള് പ്രചരിപ്പിച്ചുകൊണ്ട് ശ്രമങ്ങള് നടത്തുന്നത് നിര്ഭാഗ്യകരമാണ്. ഇത്തരം ശ്രമങ്ങളെ തിരുവനന്തപുരം മേഖലാ യൂണിയന് ശക്തമായി അപലപിക്കുന്നു. മേഖലാ യൂണിയന്റെ ഭാവി പ്രവര്ത്തനങ്ങള്ക്ക് എല്ലാ വിഭാഗം ജനങ്ങളുടെയും പിന്തുണ ഉണ്ടാകണം.
കര്ഷകരില് നിന്ന് പാല് സംഭരിച്ച് പാലും പാലുത്പ്പന്നങ്ങളും ആക്കി വിറ്റ് അതിന്റെ ലാഭം തിരികെ കര്ഷകര്ക്ക് നല്കുന്ന പ്രസ്ഥാനമാണ് മില്മ.
തിരുവനന്തപുരം മേഖലാ യൂണിയന് കര്ഷകര്ക്ക് ഇന്സെന്റീവായി ഏകദേശം 19 കോടി രൂപയും വിവിധ കര്ഷക ക്ഷേമ പ്രവര്ത്തനങ്ങള്ക്ക് ഏകദേശം 25 കോടി രൂപയും കഴിഞ്ഞ സാമ്പത്തിക വര്ഷം ചെലവഴിച്ചിരുന്നു.
ഈ സാമ്പത്തികവര്ഷം 30 കോടി രൂപയുടെ പദ്ധതികളാണ് കര്ഷകര്ക്കായി നടപ്പിലാക്കുവാന് തീരുമാനിച്ചിട്ടുള്ളത്.
