തിരുവനന്തപുരം: മില്മയില് സീനിയര് മാനേജര് (മാര്ക്കറ്റിങ് – കാറ്റഗറി നമ്പര് 460/2024) തസ്തികയില് പിഎസ്സി നടത്തിയ പരീക്ഷയിലും തിരിമറി. മതിയായ യോഗ്യത ഇല്ലാതെ നല്കിയ പ്രവൃത്തി പരിചയ സര്ട്ടിഫിക്കറ്റ് പിഎസ്സി അംഗീകരിച്ച് ഇഷ്ടക്കാരെ റാങ്ക് ലിസ്റ്റില് ഒന്നാം സ്ഥാനത്തെത്തിച്ചു. യോഗ്യത സംബന്ധിച്ച് മില്മയില് നിന്ന് വ്യക്തമായ നിര്ദേശങ്ങള് ഉണ്ടായിരുന്നിട്ടും പിഎസ്സി ചട്ടം ലംഘിക്കുകയായിരുന്നു. മതിയായ യോഗ്യത പിഎസ്സി വിജ്ഞാപനത്തില് വ്യക്തമാക്കിയിരുന്നെങ്കിലും അഭിമുഖ പരീക്ഷയില് പ്രത്യേക താത്പര്യപ്രകാരം എല്ലാം അട്ടിമറിച്ചു.
മില്മയില് കരാര് മുഖേന മാര്ക്കറ്റിങ് കണ്സള്ട്ടായി ജോലി നോക്കിയിരുന്ന ശ്രീജിത്ത് ആര്. നായരെയാണ് പിഎസ്സി പ്രത്യേക പരിഗണന നല്കി റാങ്ക് ലിസ്റ്റില് ഒന്നാമനാക്കിയത്. മാനേജീരിയല് തസ്തികയിലേക്ക് എഫ്എംസിജി, ഡയറി, ഫുഡ് സേഫ്റ്റി എന്നിവയില് 10 വര്ഷത്തില് കുറയാത്ത പ്രവൃത്തിപരിചയമാണ് യോഗ്യത. ശ്രീജിത്ത് ആര്. നായര്ക്ക് ഏഴ് വര്ഷത്തെ പ്രവൃത്തി പരിചയമാണുള്ളത്. ഓണ്ലൈന് പരീക്ഷ കഴിഞ്ഞ് നാലാം റാങ്കിലെത്തിയ ശ്രീജിത് അഭിമുഖ പരീക്ഷ കഴിഞ്ഞപ്പോള് ഒന്നാം സ്ഥാനത്തായി. ഒന്നാം റാങ്കുകാരനായ അരുണ് സോമന് മൂന്നാം റാങ്കിലുമായി.
2024ല് പിണറായി സര്ക്കാരിന്റെ സ്വാധീനത്തില് കരാര് അടിസ്ഥാനത്തില് മാര്ക്കറ്റിങ് കണ്സള്ട്ടന്റായി മില്മ തിരുവനന്തപുരം മേഖല യൂണിയനില് ശ്രീജിത് ജോലിയില് പ്രവേശിച്ചു. നിയമനത്തിനെതിരെ ക്ഷീര വികസന വകുപ്പില് പരാതി എത്തുകയും തുടര്ന്ന് നടത്തിയ അന്വേഷണത്തില് മതിയായ യോഗ്യത ഇല്ലെന്ന് കണ്ടെത്തി. സര്ക്കാരിന്റെയോ രജിസ്ട്രാറുടെയോ അനുമതി ഇല്ലാതെ നിയമിച്ചതിനാല് നിയമനം അസാധുവാക്കിയെങ്കിലും നടപടി സ്വീകരിച്ചില്ല. ഇതോടെ സര്ക്കാര് സ്വാധീനത്തില് മില്മയില് സീനിയര് മനേജര് തസ്തികയിലേക്ക് പിഎസ്സിയെക്കൊണ്ട് വിജ്ഞാപനവും പുറപ്പെടുവിച്ചു.
ശ്രീജിത് മില്മയില് ജോലിയില് പ്രവേശിക്കുന്നത് 2024 ജനുവരി 22നാണ്. മില്മയില് ഉള്പ്പെടെ ജോലി നോക്കിയ പ്രവൃത്തി പരിചയം വച്ചുനോക്കിയാല് ഒമ്പത് വര്ഷവും എട്ട് മാസവുമേ ആയിട്ടുള്ളൂ. രണ്ടര വര്ഷം ജോലി നോക്കിയത് മാര്ക്കറ്റിങ് കണ്സള്ട്ടന്റായിട്ടായതിനാല് മാനേജീരിയല് തസ്തികയില് ഈ പ്രവൃത്തി പരിചയ സര്ട്ടിഫിക്കറ്റ് അംഗീകരിക്കാനാകില്ല. എന്നാല് ഈ പ്രവൃത്തി പരിചയ സര്ട്ടിഫിക്കറ്റ് ഉള്പ്പടെ ഹാജരാക്കിയാണ് അഭിമുഖ പരീക്ഷയില് ശ്രീജിത്താണ് ഒന്നാം റാങ്കിലെത്തിയത്. സര്ക്കാര് അസാധുവാക്കിയ നിയമനത്തില് പ്രവൃത്തി പരിചയ സര്ട്ടിഫിക്കറ്റ് പോലും മില്മയില് നിന്ന് നല്കാനും പാടില്ല. മില്മയില് കരാര് ജോലിയില് പ്രതിദിനം 4000 രൂപ ശമ്പളും ടിഎ, ഡിഎ തുടങ്ങിയ അലവന്സുകളും നല്കിയിരുന്നു. പിഎസ്സി വഴി ജോലി ലഭിക്കുമ്പോള് പ്രതിമാസം 2 ലക്ഷത്തോളം രൂപ ശമ്പളമായി ലഭിക്കും. സാധാരണ മില്മയില് ജോലി നോക്കുന്ന ജിവനക്കാര് സ്ഥാനക്കയറ്റത്തിലൂടെയാണ് ഈ തസ്തികയില് എത്തുന്നത്. തിരുവനന്തപുരം ഒഴികെ എല്ലാ യൂണിയനുകളിലും ഇത്തരത്തിലാണ് നിയമനം. എന്നാല് തിരുവനന്തപുരം മേഖലയില് ഉയര്ന്ന ശമ്പളത്തില് സീനിയര് മാനേജര് തസ്തികയില് നിയമനം നടത്തുന്നതിനാല് മറ്റ് ജീവനക്കാര്ക്ക് ഇനി സ്ഥാനക്കയറ്റം ലഭിക്കാനും സാധ്യതയില്ല.
ജന്മഭൂമി ഓണ്ലൈന്