തിരുവനന്തപുരം: നവകേരളാ യാത്രയ്ക്കിടെ മുന്മുഖ്യമന്ത്രി പിണറായി വിജയന്റെ ഗണ്മാന് ഉള്പ്പെടെ സുരക്ഷാ ഉദ്യോഗസ്ഥര് യൂത്ത് കോണ്ഗ്രസ് നേതാക്കളെ മര്ദിച്ച കേസില് മുന്കൂര് ജാമ്യാപേക്ഷ ചൊവ്വാഴ്ച പരിഗണിക്കും.അനില് കല്ലിയൂരിന്റെയും എസ് സന്ദീപിന്റെയും മുന്കൂര് ജാമ്യാപേക്ഷയാണ് ആലപ്പുഴ ജില്ലാ സെഷന്സ് കോടതി പരിഗണിക്കുക. വധശ്രമം ഉള്പ്പെടെ ജാമ്യമില്ലാ വകുപ്പുകള് ചേര്ത്തതിന് പിന്നാലെയാണ് ഇരുവരും ജാമ്യാപേക്ഷ നല്കിയത്. മൂന്നു മുതല് അഞ്ച് വരെ പ്രതികളുടെ മുന്കൂര് ജാമ്യാപേക്ഷയും നാളെ തന്നെ പരിഗണിക്കും.
കേസില് പ്രതികളായ സുരക്ഷാ ഉദ്യോഗസ്ഥര് ഒളിവിലാണ്. അഞ്ചുപേരുടേയും മൊബൈല് ഫോണുകള് സ്വിച്ച്ഡ് ഓഫ് ആണ്. ജാമ്യമില്ലാ വകുപ്പുകള് ചുമത്തിയതോടെയാണ് പ്രതികള് ഒളിവില് പോയത്. ഇവര്ക്കായി കേരളത്തിന് അകത്തും പുറത്തും അന്വേഷണം പ്രത്യേക അന്വേഷണ സംഘം ഊര്ജിതമാക്കി.
