കൊച്ചി: സ്കൂൾ വിദ്യാർഥിനികൾക്ക് മൂന്നു ദിവസത്തെ ആർത്തവ അവധി നൽകുമെന്ന സർക്കാരിന്റെ പദ്ധതി പുതിയ അധ്യയന വർഷം മുതൽ നടപ്പിലാക്കാൻ ഒരുങ്ങുമ്പോൾ സോഷ്യൽ മീഡിയ അക്കൗണ്ടുകളിൽ നിന്നും വിമർശനങ്ങൾ ഉയരുന്നുണ്ട്.
ഇതിനിടെ, തീരുമാനത്തിൽ സർക്കാരിന് പൂർണ്ണ പിന്തുണ പ്രഖ്യാപിച്ച് നടിയും ടെലിവിഷൻ അവതാരകയുമായ അശ്വതി ശ്രീകാന്ത്. തന്റെ സോഷ്യൽ മീഡിയ പേജിലൂടെയാണ് താരം പ്രതികരണം പങ്കുവച്ചത്.
തീരുമാനത്തെ വിമർശിച്ചുകൊണ്ട് രംഗത്തെത്തുന്നവരുടെ സമത്വവാദങ്ങളെ അശ്വതി രൂക്ഷമായി പരിഹസിക്കുന്നു. ആർത്തവ അവധിയെ എതിർക്കുന്നവരുടെ പ്രതികരണങ്ങളിൽ ഇക്വാലിറ്റിയെക്കുറിച്ചുള്ള അബദ്ധ ധാരണകളും, അടിസ്ഥാന ലൈംഗിക വിദ്യാഭ്യാസത്തിന്റെ കടുത്ത കുറവുമാണ് മുഴച്ചുനിൽക്കുന്നതെന്ന് താരം കുറിച്ചു.
ഇന്‍സ്റ്റാഗ്രാം പോസ്റ്റ് ഇങ്ങനെ;
ആർത്തവ അവധി എന്ന പ്രഖ്യാപനം പ്രസക്തമാവുന്നത് അതൊരു ജൈവപരമായ വസ്തുതയെ ഉറക്കെ അംഗീകരിക്കുന്നു എന്നത് കൊണ്ടാണ്.
ആർത്തവ അവധി പെൺകുട്ടികൾക്ക് പ്രത്യേക ആനുകൂല്യം നൽകുകയല്ല. ജനസംഖ്യയുടെ പകുതിയോളം ആളുകൾ അനുഭവിക്കുന്ന ഒരു സ്വാഭാവിക ജൈവപ്രക്രിയയുടെ സമയത്ത് ആവശ്യമായ പിന്തുണ നൽകലാണ്, Rest നെ Normalise ചെയ്യലാണ്.
സമത്വം എന്നത് എല്ലാവർക്കും എല്ലാം ഒരുപോലെയാണെന്ന് നടിക്കുന്നതല്ല, വ്യത്യസ്തമായ ആവശ്യങ്ങൾ തിരിച്ചറിഞ്ഞ് അതനുസരിച്ച് പിന്തുണ നൽകുന്ന സംവിധാനങ്ങൾ സൃഷ്ടിക്കുന്നതാണ് യഥാർത്ഥത്തിൽ സമത്വം.
ഒളിച്ചും മറച്ചും നാണിച്ചും അപമാനം അനുഭവിച്ചും കുറ്റബോധം പേറിയും കഴിച്ചു കൂട്ടിയ തലമുറകളുടെ പിൻഗാമികളെങ്കിലും ആർത്തവത്തിൽ ആശ്വസിക്കട്ടെ !!
Let our daughters bleed safely.
Not in silence.
Not in shame.
Not while pretending they’re okay when they’re not.
