കൊച്ചി: പാചകവാതക ഉപഭോക്താക്കളെ ഒരു വിതരണ ഏജന്സിയില് നിന്ന് മറ്റൊന്നിലേക്ക് മാറ്റാന് എണ്ണക്കമ്പനികള്ക്ക് അധികാരമുണ്ടെന്ന് ഹൈക്കോടതി. ഉപഭോക്താക്കള്ക്ക് തടസമില്ലാതെ പാചകവാതക വിതരണം ഉറപ്പാക്കുക എന്നതിനാണ് പ്രധാന പരിഗണന.
എല്പിജി വിതരണക്കാര് എണ്ണ കമ്പനികളുടെ ഏജന്റുമാരാണ്.വിതരണ സംവിധാനത്തില് കാര്യക്ഷമത ഉറപ്പാക്കുന്നതിനായി കമ്പനികള്ക്ക് നയപരമായ തീരുമാനങ്ങള് എടുക്കാം.
ഉപഭോക്താക്കളെ വിവിധ ഏജന്സികള്ക്കിടയില് പുനര്വിതരണം ചെയ്യുന്നതിനായി എണ്ണ കമ്പനികള് കഴിഞ്ഞ വര്ഷം രൂപീകരിച്ച നയം ചോദ്യം ചെയ്ത് ഓള് ഇന്ത്യ എല്പിജി ഡിസ്ട്രിബ്യൂട്ടേഴ്സ് അസോസിയേഷന് കേരള സര്ക്കിള് നല്കിയ ഹര്ജികളിലാണ് കോടതി വിധി.സിംഗിള് ബെഞ്ച് ഹര്ജികള് തള്ളിക്കൊണ്ടാണ് ജസ്റ്റിസ് എം എ അബ്ദുള് ഹക്കീം നിലപാട് വ്യക്തമാക്കിയത്.
ഒരു ഏജന്സിക്ക് കീഴില് സിലിണ്ടര് റീഫില്ലിംഗിന് പരിധി നിശ്ചയിച്ച് അധികമുള്ള ഉപഭോക്താക്കളെ സമീപ ഏജന്സികളിലേക്ക് മാറ്റുന്നതായിരുന്നു പുതിയ നയം.ഇത് തങ്ങളുടെ ലാഭത്തില് കുറവുണ്ടാക്കുമെന്നാണ് വിതരണക്കാര് വാദിച്ചത്.എന്നാല് വിതരണക്കാരുടെ സാമ്പത്തിക താത്പര്യങ്ങളേക്കാള് ഉപഭോക്താക്കളുടെ സൗകര്യവും പാചകവാതക വിതരണത്തിന്റെ കാര്യക്ഷമതയ്ക്കുമാണ് മുന്ഗണന ലഭിക്കേണ്ടതെന്ന് ഹൈക്കോടതി പറഞ്ഞു.
